› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

【馮仁昭四圍超】五月天台北免費騷
粉絲狂呼

五月天為了紀念入行20年,噚晚喺台北大安森林公園開免費騷答謝粉絲。台灣《蘋果日報》

台灣天團五月天噚晚喺台北大安森林公園舉行免費演唱會,紀念組團20周年,呢度亦喺佢哋首個公開表演嘅地方。現場只有800個座位,大前晚已經有人開始排隊。雖然五月天講明會喺網上直播音樂會,但都阻唔到粉絲到現場。

擔心聲浪影響居民

演唱會喺晚上7點開始,現場約有3萬名粉絲聚集,各人情緒高漲尖叫聲此起彼落,到五月天出場更帶起高潮,佢哋先向粉絲鞠躬,再一連唱出《志明與春嬌》、《終結孤單》等經典歌曲。
五月天各成員在台上發言,講20周年嘅感受,主音阿信話:「不知不覺20年就這樣過去,謝謝在音樂台前及草皮前的粉絲,謝謝你們,讓我們繼續唱下去。」石頭話多謝大家陪佢哋回到當年今日,佢哋隨即演唱《人生海海》,仲介紹四分衛嘅阿山同虎神出場。噚晚嘅嘉賓仲有陳綺貞同樂隊脫拉庫主音國璽等。因為怕演唱會聲浪影響附近居民,演唱會喺9點半結束,而喺YouTube嘅直播吸引咗約34萬人觀看。

港騷飛個半鐘售罄

另外,五月天將喺5月嚟香港舉行10場「人生無限公司」演唱會,門票噚日開賣,喺尖沙嘴通利門口一早就有30幾名南亞裔等候,相信係排隊黨。其中嘅吳先生話喺前日下晝5點半到場,已派到50幾號籌。反而排頭位嘅外籍人士Tanveer稱前晚9點左右到達,相信係排隊黨發揮功能。噚日門票開賣約個半鐘,已全部售罄,令在場買唔到飛嘅粉絲失望。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載