› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

港姐冠軍夠「惹火」
陳法蓉「仇家」通街都係

現年49歲嘅陳法蓉,於15歲嗰年到加拿大多倫多升學,並於夏威夷大學畢業,佢喺1989年參選港姐,獲得軍及國際親善小姐名銜,其後佢代表香港先後參選1989年國際華裔小姐競選(奪得亞軍),及於翌年參加環球小姐競選,讀咁多書又見過晒大場面,加上係港姐出身,照計係好大方得體雍容華貴至係……

不過,偏偏陳法蓉鬼咁「惹火」——係火頭個火,不時同人有嗌霎,仲要見晒報嗰種,唉……

先係比較近有是非嘅梁小冰,舊年11月,梁小冰出席慧妍雅集活動,但因為佢未有着上慧妍雅集嘅粉紅色外套,被慧妍前會長陳法蓉即場問點解,一言不合就出事,小冰更因嬲豬遭對方當眾訓斥,拒絕同陳法蓉一齊影大合照。

因為呢一場交,引發「慧妍之亂」,唔單止搞到梁小冰喺舊年12月選擇退會,仲引出咗好多前港姐出嚟,各有各撐,其中袁詠儀更力撐老友梁小冰,指自己會「百分百支持小冰嘅決定」。

至於同陳法蓉同屆選港姐、分別獲得亞軍及季軍嘅朱潔儀同梁佩瑚,同陳法蓉都係有唔妥。先講梁佩瑚,佢喺梁小冰同陳法蓉單「慧妍之亂」上,冇明言撐邊個嘅,但就話覺得小冰件衫其實都有徽號,所以冇乜問題,而且自己都有send短訊畀小冰,安慰對方。

而梁佩瑚喺「慧妍之亂」之前,喺有線節目《娛樂熱辣辣》中大爆當年選美黑幕,話陳法蓉當年瞞住公司私下接受傳媒採訪,但之後就喊晒口話輯相係參選前影落扮委屈,點知就被踢爆講大話。隔咗幾日,陳法蓉喺微博反擊:「吃不到的葡萄是酸的。天下本無事,奈何多庸人自擾。」

雖然朱潔儀比較少「聲氣」,但早前有雜誌報道佢同陳法蓉都係不咬弦,話說當年佢哋當選後,被分派到劇組,朱潔儀喺90年獲派去同萬梓良、周海媚等合演台慶劇《笑傲在明天》,陳法蓉知道後,打電話畀朱潔儀,話套劇係因為自己冇時間接拍,先至彈畀朱潔儀,暗示朱潔儀執二攤,激死朱潔儀。另有指朱潔儀曾爆陳法蓉選美時食煙,但佢否認曾爆料:「大家太敏感,我從來冇指名道姓話邊個,Monica(陳法蓉)都唔食煙。」

另有周刊曾經報道過陳法蓉嗰屆嘅最上鏡小姐翁為德,因為頂唔順陳法蓉嗰種冠軍氣焰,所以兩人只係喺台前friend,台後就即刻黑面,又係唔妥嘅。

唉……人夾人緣啦……

相關新聞:曾與倪震拍拖陳法蓉難忍許晉亨蒲吧分手

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載