› 選擇地區
三藩市
紐約
洛杉磯
其他美國地區
香港 台灣 北美
 
2017年03月31日

大劉自嘲廢柴
俾猶太人老點

【劉鑾雄講大劉】
【連載系列之二 風扇血淚】富豪劉鑾雄(大劉)講完發迹前往事,再講當年棄貿易生意,轉開風扇廠自立門戶的經過。「我同拍檔出去開廠,租嘅廠房成兩萬呎,其實生意只足夠租三、四千呎地方,但我租兩萬呎,結果做咗唔夠五、六個月已經冇生意冇錢出糧,好慘㗎!」

相關新聞:大劉向前外母借錢創業

寧蝕讓免血本無歸

有危就有機,當時大劉遇到一名猶太人願意買貨,但要貨到美國才付款,大劉說:「我又比較aggressive(進取),嗰時賖啲貨畀佢,去到美國先畀錢,點知貨到,佢話五折就找數,嗰時我都係賺15%。」大劉即時講價願意七折收錢,寧蝕30%以免血本無歸,最後雙方拉倒,大劉將貨在美國入倉,再作打算。
豈料走投無路時,猶太買家又再出現,更點了大劉去芝加哥,竟給他翻身機會:「我去到坐咗兩三日,坐坐吓猶太佬趕我走,我好醒目扮走,再喺二、三百米外睇吓乜事,見到有個擔住支煙嘅美國人行埋去,猶太佬好熱誠招呼佢,指手畫腳指住風扇傾咗大約二十分鐘。美國人走咗之後,我遠遠跟咗佢成千五呎先敢蒲頭,同佢講我係廠家。」
大劉才發現自己是「廢柴中嘅廢柴,懵炳中嘅懵炳」,他說:「個猶太佬好叻好蠱惑,我哋嘅風扇唔符合美國安全規格,猶太佬將風扇加工變為合規格,我哋唔知嘛!結果我喺芝加哥踎咗三個月,先至發現自己係廢柴中嘅廢柴!乜都唔識!」幸好大劉出門遇貴人,有位好心工程師教他將風扇改成符合美國規格。當再見那位美國人時,已答應落單,大劉說:「佢話第一次買呢個產品,估計一年同我買24,000把風扇,點知最後買咗24萬把風扇,多十倍!我都冇諗到突然可以窮人大翻身。乜跳樓呀,一定執笠,都唔敢返嚟(香港),冇面見江東父老。」

走過水貨好大壓力

大劉在發迹前亦從事過水貨貿易,跟尼日利亞及西非做生意,利錢很深,十多萬成本有二十多萬利錢,不過走了三轉後自命膽大的他亦不敢再玩,他說:「好大壓力,因為當時冇外匯,好大風險,收到錢後做咗第三輪水貨,頭尾賺咗百幾萬知道遲早一鑊!好在我命大,唔做之後大約半年,尼日利亞政變,新政府上場,唔認舊政府啲數,全香港所有出口商,俾尼日利亞政府走咗40幾億。當時嘅40幾億,我諗等於𠵱家1,000億!」
採訪:陳月媚
攝影:陳俊強

【Timeline】手機用戶請按此,瀏覽「傳奇狙擊手劉鑾雄 」: http://bit.ly/LAU-timeline




【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載