› 選擇地區
三藩市
紐約
洛杉磯
其他美國地區
香港 台灣 北美
 
2017年03月31日

【搲like有理?】
IG女神廣告月賺過萬 KOL賣膠定食膠

【KOL個L】近年越嚟越多人投身KOL行列,同時亦有網上輿論批評KOL呃like當飯食,今集就講吓KOL有咩商機。IG靚女紅人Merry So喺四、五年前已經開始玩Instagram,而家有超過6萬個followers,仲有唔少知名時尚、彩妝品牌搵佢合作,經常有獲贈靚衫同最新嘅化妝品,真係令一眾女士心心眼!

著名營銷人徐緣就睇好KOL日後嘅發展,「我覺得KOL會係一個重要嘅經濟體。」據徐緣分析,網紅經濟背後有三個重要收入渠道,第一個收入來源就係最傳統嘅廣告。問Merry會唔會揀廣告接? 佢即刻答:「梗係會啦!我對自己有要求,好多嘢你都要問自己係咪真心鍾意,同埋靚,你先擺上身。我知道自己嘅形象,大家都看在眼內,可能我接咗呢個job賺到筆錢,但損失更加大,我亦唔想帶畀觀眾一啲唔好嘅資訊。」咁識do,唔怪得之每次出post,閒閒哋都有過千個like啦!Merry話佢IG廣告同內容嘅比例大約係三七:「有七成係個人生活照,三成係廣告,每個月咁計都有過萬收入。」

不過提到KOL賣廣告,涉獵傳媒、寫作、廣告、電影、紅酒、飲食界等百足咁多爪嘅畢明就有畢生難忘嘅經歷:「同過一個據聞係飲食界KOL傾計,基於好奇,我就問佢係咪好鍾意食嘢,佢話唔係㗎,邊個請我咪去邊度食囉。嘩,你坦白成咁!咁如果人哋唔請你呢?咪唔食囉!o依,咁樣呀?我又問佢寫嘢會寫咩呀?佢話其實都唔係好寫嘢,影相咪得囉。嘩!咁都好容易做下喎。不過咁,佢係有幾萬like嘅。」

以上呢位人兄係咪真係KOL就唔敢講,但徐緣就話只要識利用網絡優勢,唔一定靠大量嘅like都可以做到生意,「只要你有人follow,係好狂熱嘅,就算人數少,都可以引發其他經濟,包括從第二渠道E-commerce(電子商貿)賺錢,sell粉絲某件貨。」國內就有唔少網紅,透過社交媒體或者直播節目了解粉絲需要,同生產商合作,度身訂做產品,例如衣服、甚至機迷專用滑鼠。對於Merry嚟講,雖然個人IG每月都有收入,不過佢主要收入來源係透過IG賣自己設計嘅耳環。由細到大都鍾情耳環嘅佢,喺2013年辭去全職售貨員工作,食住IG人氣創立耳環品牌,由設計耳環、搵廠商合作、包裝、宣傳等通通一腳踢。Merry話:「我由一開始推出呢個耳環品牌,已經有一班人馬上支持我,畀我賺返佢哋啲錢。」除咗網購,Merry仲不時會參加市集擺地攤,增加品牌人氣兼銷量,「曾經試過一個月賣四百幾對耳環,比起以前售貨員嘅工作,收入都有五至六倍嘅分別。」

而網紅背後,仲有第三個重要獲利方式,就係直播打賞制,徐緣解釋,「直播主喺直播節目冧粉絲,粉絲即時撳個制,就可以打賞錢畀直播主。」例如韓國知名女大胃王朴熙妍(Diva),每晚都會做直播節目,畀觀眾睇佢喪食兼吹水,粉絲會即時送出虛擬氣球作打賞,每月平均收入可高達七萬港元。所以話食,都係一種搵食嘅專業!相對外國,直播節目喺香港唔算盛行,徐緣表示:「香港發展嘅網紅商機只係一個小部份,就係廣告。」佢話當呢個行業繼續發展落去,知道呢個做法搵到錢之後,就會有專業機構為各類網紅提供支援,或者有機構主動去發掘有潛質嘅網紅,叫網紅孵化器(Incubator)。

或者有人會對KOL呢個名嗤之以鼻,王貽興就撐搵食無罪,「?like」有理,「前輩梁文道講過一句說話,每次作家被邀請去做講座,臨尾送錦旗、送舊膠畀你,咁作家食膠㗎?作家食錦旗㗎?作家都要生活㗎嘛,KOL用佢嘅專業,合理地賺取報酬,有咩問題?」

而徐緣亦提醒以KOL為長期搵食工具並唔容易,「做網紅搵到錢,好大程度上佢要好穩定地生成有質素嘅內容。有啲KOL發表嘅意見,可能只係對生活嘅不滿,呢啲好難維持,好容易講到冇嘢講。其實用趣味去包裝唔同知識,我認為呢個發展先更健康,豐富到社會知識面。」


唔好錯過【KOL個L】相關動新聞:

【KOL個L】敢做唔敢認 KOL爆Likes先係King?
http://bit.ly/2o7flQF

【KOL個L】借刀殺人做愛情KOL 蘭桂坊身經百戰?
http://bit.ly/2oaMZF3

【薯片叔做邊類KOL好?】笑波子主L-Laughter 陶傑攻O-Opinion
http://bit.ly/2nJWRrO

場地提供:小城故事(太子彌敦道761號3樓A室)

記者:何宛珊(表妹)
攝影:馮峰、Neo、Kaman
視像設計:希彤、余湘汶
後期:Roy
編審:阿仙
監製:Kaman

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載