› 選擇地區
三藩市
紐約
洛杉磯
其他美國地區
香港 台灣 北美
 
2017年04月01日

父失業被騙家財
大劉斬柴煮飯 孭起頭家

【劉鑾雄講大劉】
【連載系列之三 童年清苦】富豪劉鑾雄(大劉)接受本報獨家專訪,上回講完當年棄貿易生意,轉開風扇廠自立門戶的經過後,今集又講到童年往事,他強調自己並非含金鎖匙出世。大劉父親劉火榮最初是開米舖,之後開過製衣廠,但被人騙盡家財,一家人生活頗艱苦。大劉憶述:「我出世嗰陣時,爸爸都風光過一段好短時間,跟住冇幾耐失業,家庭靠媽媽維持,唔可以講含金鎖匙出世或好輕鬆。」

一家人睡地下

因家庭環境不好,大劉10歲前都要做粗活、一家人要睡地下:「我記得10歲前住木樓,熱天搵張蓆鋪喺地下,冬天又搵毯鋪喺地下,我哋喺地下瞓到10歲先搬,所以童年生活屬於比較清苦。」
據知大劉的母親劉葉淑婉女士當年是以繼室身份嫁給劉父,當時她不但要照顧自己一頭家,連丈夫亡妻那頭家,都要照顧,所以擔子很重。大劉表示:「辛苦㗎!你知一個女人,唔係讀過乜嘢書,當年香港大家都好窮,大部份人都係大陸解放後落嚟,唔係好多人帶到錢落嚟。我所知屋企初期開米舖,之後開過製衣廠,但俾人呃晒,好後期先開風扇廠。聽阿媽講好多次,成日想儲五萬蚊,儲好多次都儲唔到,當時好多人喺大陸解放落嚟都好辛苦,個個都要捱同慳。」

「衝上天台收衫」

到底大劉10歲前要做甚麼粗活?大劉憶述:「我係長子,比較力大啲,做粗重嘢比較適合啲。有時落雨,一個箭步就要衝上天台收衫,所以呢啲我熟晒,舉例掃地、拖地、食完飯執枱,所有我都做得好足,做到熟晒!我真係差唔多任何家務都做過晒㗎,而且做得好精,包括斬柴、起火,以前冇熱水供應,只能夠喺爐灶起火,煲就用銅煲,沖涼、煮飯、煮餸,所有熱水都係我負責,試過斬柴斬親手指,之後斬斬吓已經練到好熟同好快。」直至大劉10歲後,父親開了風扇廠,家庭環境才慢慢改善。
採訪:陳月媚
攝影:陳俊強

【Timeline】手機用戶請按此,瀏覽「傳奇狙擊手劉鑾雄 」: http://bit.ly/LAU-timeline


【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載