› 選擇地區
三藩市
紐約
洛杉磯
其他美國地區
香港 台灣 北美
 
2017年04月04日

「點知小便後有冇清潔」
大劉毛巾傍身握手諗諗

【劉鑾雄講大劉】
【連載系列之六 潔癖之謎】劉鑾雄(大劉)的潔癖傳聞響遍全港,日前他接受《蘋果》獨家專訪,揭開所有謎團。傳聞一,保鮮袋裝銀紙,大劉承認:「我有用保鮮紙裝銀紙,用保鮮紙掹啲銀紙畀人。通常呢啲都係自己一個人去食碗雲吞麵,可能食6、70蚊,畀30蚊貼士,找嗰啲數就唔攞喇。」

銀紙好污糟

大劉不肯用手掂銀紙是有原因:「有傳媒講,啲英鎊有8、90%,銀紙上面都有cocaine成份喺度,啲人用銀紙食可卡因都唔係最污糟,你點知啲人係咪大小便唔洗手再掂到啲銀紙?你諗起乜嘢都可能發生。如果我被迫掂,我咪即刻洗手囉。」
傳聞二,司機保鑣必備白毛巾,大劉解釋:「其實條毛巾呢,就唔係擺喺手臂嘅,有時主要係用嚟扶住手腕。點解要咁樣擺條毛巾呢?因為我好多年前見到有啲男性朋友,小完便唔洗手,好多都係咁。收尾我又見到美國傳媒話有啲女人,小完便又係唔洗手,咁我又比較乾淨啲,唔係話嚴重潔癖,只係注重衞生。」
傳聞三,從不握手,大劉說:「啲人話我唔鍾意同人握手,話我驚俾人沾咗我啲財氣。第一,我冇財氣;第二,啲人誇張咗,因為我見過好多男性朋友小完便唔洗手,你點敢同佢握手吖?有時你被迫握手,或者被迫同佢打牌,咁你有時自己都會,驚驚哋避避哋囉!」

肥皂非即棄

傳聞四,新奇士橙標誌少一個英文字母就不要,大劉沒好氣說:「梗係冇咁嘅事啦,你估我儍嘅咩?啲人真係好誇張,唯恐天下不亂咪講得嚴重啲囉。如果有我一定認。」傳聞五,肥皂只用一次就扔,他同樣否認:「一定冇咁嘅事,點會用一次就唔要?一定係有人誇張,人云亦云先至咁講。我鍾意乾淨,成日洗手,所以我對手好粗。」
採訪:陳月媚
攝影:陳俊強

【Timeline】手機用戶請按此,瀏覽「傳奇狙擊手劉鑾雄 」: http://bit.ly/LAU-timeline


【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載