› 選擇地區
三藩市
紐約
洛杉磯
其他美國地區
香港 台灣 北美
 
2017年04月06日

【搵兩萬還萬四】
Sing之天使菠蘿哭訴出唔到碟 做OL兼影相

郭穎橋呢個名你未必記起,但講你知佢係2009年綜藝節目《耳分高下》入面做「Sing之天使——菠蘿」,你就一定有聽過。

相關新聞:孫慧雪嫁圈外男友兼人母陳宛蔚做「天使」識老公

今年30歲嘅「菠蘿」,雖然當時嘅名氣唔及「藍莓」劉俐同「柑桔」蕊蕊,自言唔夠靚,但都賺到蚊錢,佢坦言行性感係work、多咗嘢做,不過佢話:「可以唔性感就唔好太性感,希望喺節目度攞到個曝光率,之後出番嚟做歌手,都唔會畀人哋覺得係一個o靚模囉。」搵到啲錢又點?佢嘅夢想係做歌手,喺2008年同一間經理人公司簽咗份「不平等條約」:「我當你賺兩萬蚊先,你嗰個月都還咗萬四啦。我係唱demo然後簽公司做歌手,我希望我熱愛嘅嘢可以唱到畀大家聽,但係派第一隻歌,唔係你鍾意唱嘅嘢。」當時出咗兩首歌《兩生花》同《好痛呢》都係行輕快活潑嘅歌曲類型,做唔到理想嘅歌手有遺憾嗎?佢突然眼泛淚光:「最遺憾係出唔到碟,覺得細個唔識嘢,所以搞到咁…」

唔撈大台、之後更因為唱片公司執笠,加上佢同經理人公司打解約官司,搞到佢喺娛樂圈冇晒蹤影:「官司花咗5年settle,耗盡咗青春。我返咗去做office,做老闆嘅助理(秘書)。」佢繼續話:「我唔係生於大富之家,亦知道唱歌唔可以一直去堅持,應該要腳踏實地去試吓轉型,所以去學一門手藝係學到老都用得到。」做OL嘅郭穎橋儲咗啲錢去台灣學攝影、同去英國進修影BB:「我鍾意小朋友,但影小朋友係俾我搵食嘅。我希望做到攝影家,希望可以周圍去影相,雖然呢樣嘢好遙遠,但你要有夢想,先令你可以向前行。」

相關新聞:「Sing之天使」藍莓轉行做sales雪梨教瑜伽殺出血路

佢o依家繼續返緊office,兼做攝影師,無悔入過娛樂圈嘅佢,行呢條攝影路一啲都唔易:「我覺得我marketing太差,好似社交網絡入面有啲女仔影相叻到出event。喺我角度如果做一個全職攝影師,就係你會接商業嘅工作,可以出去接其他event,以攝影師個銜頭去做,你影嘅相係可以攞出去賣嘅。你有人際網絡,就好容易做得起所有嘢。」

化妝: Milk Cheng
場地:Mr & Mrs Fox
採訪:懷鈺、嵐山
攝影:陳慧安
攝錄:馮峰、Neo

郭穎橋 wedsite:www.kiukwok.com
www.instagram.com/kiukwok
www.facebook.com/kiukwok photography

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載