› 選擇地區
三藩市
紐約
洛杉磯
其他美國地區
香港 台灣 北美
 
2017年04月07日

鄭俊弘認講大話
拖何雁詩公告戀情

33歲鄭俊弘(Fred)被爆背未婚妻偷嗒何雁詩(Stephanie),兩人由最初死口不認拍拖,直至前晚拖手斷正短片曝光,「雁鄭」終於要跪低承認戀情,昨日傍晚十指緊扣現身機場,被封賤男的鄭俊弘高調送新歡,對於網友指他是大話精,鄭俊弘尷尬解釋因想保護其他人才低調。

相關新聞:拖手贈公司高層興

憑無綫《星夢傳奇》節目彈起的鄭俊弘,被富貴未婚妻beebs的閨蜜向周刊爆料,指他暗交24歲的巨聲幫何雁詩,前日被指小三的何雁詩堅稱只是普通好朋友,被網友封世紀賤男的鄭俊弘,接受無綫獨家訪問強調跟beebs關係已結束,當問到何雁詩被指是小三,他說:「我好抱歉,佢唔係第三者。」然而,昨凌晨兩人十指緊扣到西貢睇樓的短片曝光,被踢爆講大話!

叫大家錫住愛郎

經過一晚思量,「雁鄭」昨日傍晚約6時30分拖手高調現身香港機場離境大堂,鄭俊弘親自送何雁詩機兼幫她拖行李篋,他說:「我同Step一直以嚟好好朋友,我哋喺音樂上、生活上觀點好相似,𠵱家多工作機會接觸,我一直對感情好低調,所以之前嗰段感情冇人知,但呢段感情已經終結咗。」
問到是否承認之前講大話?鄭俊弘說:「我哋呢段感情剛開始,想珍惜同保護,所以選擇咗唔公開,但噚日一段報道,我一定要企出嚟澄清,希望大家畀啲空間我哋,希望有美麗關係。」對於被影到一齊睇樓,她說:「係,但未諗到咁遠,希望大家畀多啲支持,佢好大工作壓力,我唔喺香港,大家睇住佢。」
會否介意被指大話精?鄭俊弘只說:「因為呢啲係想保護其他人,所以我選擇低調處理。」問拖手亮相有否通知公司?何雁詩表示:「佢哋知道。」對於高層何哲圖昨仍指兩人沒拍拖,是否連公司都呃?她尷尬說:「佢都係今日先知,至於大話精呢樣嘢,我哋承認呢幾日講啲誤導大家嘅嘢,保護呢段關係以為最好,但今日企出嚟話畀大家知,係好勇敢。」問鄭俊弘會否承諾好好照顧女方?他只說:「未來嘅嘢未來先算,我哋做好每一日。」反而何雁詩大方說:「有信心嘅,冇信心都唔會今日企出嚟同大家講。」

相關新聞:【踢走正印】何雁詩大勝

形象破產失工作

跟着鄭俊弘拖手送女友入閘後,問到7月紅館騷是否被取消,他表示不清楚,對於傳奀星陳婉婷曾訛稱大肚逼他公開關係,他否認:「呢啲係炒作,唔再回應,只係喺公司見過。」記者再追問工作有否受影響?擔心形象破產?他全部封嘴。惟有業界人士向《蘋果》爆料,指鄭俊弘偷食曝光,嚇退客戶損失約六位數。
採訪:張俊銘、畢紹基
攝影:仇志德、陳順禎、孔志豪

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載