› 選擇地區
三藩市
紐約
洛杉磯
其他美國地區
香港 台灣 北美
 
2017年04月11日

【馮仁昭四圍超】四場同一個喊位被質疑
薛凱琪真眼淚

薛凱琪(Fiona)一連四場演唱會,前晚喺旺角麥花臣舉行尾場,佢繼續做喊包,仲喺台上分享今次個騷其中一個主題係快樂,佢話:「快樂唔使搵,常陪你左右。上天對我好好,畀好多嘢我,只要肯去搵同相信,唔好怕付出,唔好問回報。雖然呢個場唔係紅館,但你哋千幾位都好重要,希望有一日唔係靠我嘅愛畀你哋能量,而係你哋學識將愛去分享畀其他人,多謝你哋畀機會我去愛你哋。」

分享快樂

臨完場前,Fiona再話:「何為快樂?多諗別人,少諗自己就會快樂,送最後一首歌《慕容雪》。」不過佢唱咗幾句就嗌停,喊住問可唔可以再嚟過:「今晚最後一場最後一首歌,想唱好啲。」
Fiona完騷後受訪,佢笑話:「好難相信唱呢個騷會攰過紅館四、五倍,可能今次用舞台劇方式去做,一個人獨腳戲去包裝音樂,其實冇人做過,有一定危險,而且我有一段時間冇plug新歌。」
講到唱《字花》已經喊,Fiona話首歌係抑鬱症康復之後寫,好想自己能夠放低,亦想話畀大家聽,就算幾黑暗都好,每個人都可以企番起身。問到佢不停提住大家去感受愛,但每一場都係同一個位喊?佢話都有粉絲問過呢個問題,分唔到究竟係演戲定真實,佢強調係真感情:「因為情感投入,所以每晚都心力交瘁。
撰文:馮仁昭」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載