› 選擇地區
三藩市
紐約
洛杉磯
其他美國地區
香港 台灣 北美
 
2017年04月12日

阿澤遇機位超賣:
究竟係乜可以咁保障航空公司?

相信昨日大家都有留意美國聯合航空機位超賣呢單新聞,搞到有四位乘客被要求落機,而其中一位華裔乘客拒絕就範,結果遭強行拖走,同機乘客為他感到不值,事件亦引起全球網民憤怒。

向來不平則鳴嘅杜汶澤,原來都試過有類似經歷,佢昨日就喺facebook上寫咗一大段令你仿如置身其景嘅對話﹕

「你唔係唔知,航空公司有超賣機位夏話?」今日見到UA單新聞,真係好心噏。其實大家又知唔知,你俾咗錢訂咗機位,都唔代表你100%上到機。我同助手尾寶,就試過咁嘅經?。

話說有一次去某個國家拍戲,果度出曬名無啖好食,所以一般人如果唔係為咗錢,絕對唔會去。Any皮,果朝早我地去到機場check in。
個地勤人員(利申唔是UA)話:杜先生,唔好意思,班機爆咗。
我:哦...... 咁好生意?咁恭喜你喎。
地:...... 你無位喎。
我:吓?哦。尾寶!
咁尾寶咪比張 e ticket 比佢囉。
地:係,你係訂咗位,不過我地爆左喇,所以你上唔到機喇!
我同尾寶異口同聲大叫:係咪真o架?
一諗到唔使再去某國,兩個即時跳起 yeah 啦!
之後我就同個地勤講:咁麻煩你同個製片講有件咁嘅事,今日拍唔到嘞,你話你肯賠,咁就 ok 啦!咁我就返去瞓嘞吓!
寶:好呀!多謝你呀小姐,我其實好眼瞓呀!

出咗名成日肚餓同眼瞓嘅尾寶當然好開心。即刻打俾製片,然後將個電話交比地勤人員。我隱若聽到電話裡面傳來鏗鏘響亮嘅粗口聲,從地勤個樣睇嚟,件事其實未完。地勤收綫之後,打咗個電話,跟住又有一兩個人過嚟,又㩒下部電腦。之後佢好似好X驚喜咁吊高把聲話:綺!杜先生!我搵到個位比你呀!
我:「搵到」個位比我?我訂咗o架!
之後我地拖住兩個hand carry 同兩條半睡嘅身軀上機。
寶:「搵到」個位喎,九成九搵到第二個好蝦d嘅乘客就真啦!
我:咁梗係啦。

其實我都仲係好好奇,究竟咩政權,可以咁樣保障生意佬呢?點解因為飛行成本高,就可以一千個位賣千幾張機票呢?點解比咗錢都唔等於飛到呢?究竟係咩logic乜嘢法律可以咁保障航空公司呢?係咪全世界都咁呢?

當然大富豪會答你,係呀!細佬,所以我自己有飛機囉,你唔鍾意搭的士你都買車啦!
有錢佬,當然會咁答。但係有時呢個世界上唔公平嘅事,就未必有人答到我。」

唔知各位又有冇類似經歷呢?!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載