› 選擇地區
三藩市
紐約
洛杉磯
其他美國地區
香港 台灣 北美
 
2017年04月15日

嘆子硬頸 無悔為事業疏忽兒女
大劉想鳴煒接班:佢從來冇提要分身家

【劉鑾雄講大劉】
【連載系列之十七 看重兒子】劉鑾雄(大劉)去年底因身體關係,將資產逐步轉移,主力分配給太太陳凱韻(甘比)及所生的一對子女,以及長子劉鳴煒,大劉直言二人從未要求「分身家」。眾子女中,大劉對長子鳴煒尤其看重,希望他可接手做華置接班人,大劉說:「我當然希望佢有做生意興趣,可以接手我啲金融投資生意。」

相關新聞:甘比身家632億

現年65歲的劉鑾雄坐擁逾1,200億身家,位居香港四大富豪之列,更有外界指他的資產被低估,估計真實身家達2,000億。去年11月,大劉親證接受了換腎手術,他就陸續開始將大量資產物業及現金分給長子劉鳴煒及太太甘比。

父子翻版

大劉日前接受本報獨家專訪,親自拆解此事:「有一樣嘢,真係講真,我個大仔,或者甘比,從來冇喺我面前提要分身家,或者要攞啲乜攞啲物。係我自己諗吓諗吓,都覺得應該點做先係對我最有利、或者係最理想嘅呢?佢哋冇提過,唔似得有啲,一早就虎視眈眈,你一瞓低一斷氣,兩腳伸直就嚟料。」

相關新聞:【甘比最多】大劉身家咁樣分

眾子女中,長子鳴煒獲大劉分配最多資產,其實外表強勢的大劉一向都最看重對方,不過兒子從小跟母親寶詠琴生活,長大後生活方式亦與大劉南轅北轍,關係疏離,連大劉也曾透露兒子不愛聽他意見,亦拒絕同住,近年關係才有改善。其實大劉非常痛錫長子,父子更是翻版,都是從小與母親關係最好,大家都是炮仗頸性格。
鳴煒在大劉心中評價相當高,大劉在訪問時透露:「佢人嘅性格品行一流,唯一缺點係硬頸啲。」

「唔好信人」

記者笑二人性格相似,大劉說:「我同佢最唔同係我比較好彩啲,我有試過遇到好低潮。我同佢一樣咁硬頸,但當你遇到低潮,你一定要馬死落地行,點硬頸都冇用。佢4歲嗰陣,我已經同佢講,第一記住唔好信人,第二都係記住唔好信人,第三都係記住唔好信人,我相信個仔都聽我講嘅!」

劉鳴煒雖辭任了華置CEO一職,但仍出任主席,問到大劉會否想兒子成為未來接班人,他表示:「第一,我真係唔知道佢有冇興趣;第二,太多長遠計劃有時未必如你所願,所以有時……今日我都唔想講太多,即係有時……唔係你想點就點㗎。親生仔親生女都未必聽自己話啦,我當然希望佢有做生意興趣,可以接手我啲金融投資生意。」
對於早年為事業拼搏,令到少陪家人與子女疏離,大劉說:「都冇得後悔㗎!為咗搵食冇辦法。顧得掂啲仔女,可能過幾年就冇(機會),咁嗰陣時點呢?揸兜做乞兒呀?人嘅嘢邊個唔知阿媽係女人啦!」
採訪:陳月媚
攝影:陳俊強

【Timeline】手機用戶請按此,瀏覽「傳奇狙擊手劉鑾雄 」: http://bit.ly/LAU-timeline




【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載