蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月05日
馬上成為壹會員

新秀贏黎明欠運退娛圈
失婚文佩玲冇拖拍「個女反對」

【《蘋果》專訪】文佩玲(文文)86年參加第五屆新秀入行,92年退出娛圈,做過保險,現職水機直銷。她99年結婚,3年後跟丈夫離婚,二人育有一女Jasmine,轉眼已經17歲。當年文文在第五屆新秀歌唱大賽,擊敗黎明、許志安奪冠,簽約華星,不過星途一般,53歲文佩玲日前接受本報專訪,重提舊事:「其實好多個都係咁樣,唔係淨係我,我覺得唔一定考第一,星途就係好,每個人嘅際遇都唔一樣,冇得唔甘心,自己嘅性格都可能有啲關係,我唔鍾意埋堆,我回想番,機會係好多,只不過未遇到一首好正嘅歌,其實我喺華星時,已經錄好一隻碟,但最終都冇出到,到𠵱家都唔知乜原因,我覺得係有少少可惜,因為有幾首歌係幾好聽。」

同台灣仔拍拖4年

當年文文分別跟梁朝偉和杜德偉合唱過《留我枕邊》及《愛全為你》:「哎呀,諗番起都驚,我唱《留我枕邊》唱到好尖,但原來好多人都鍾意,好奇怪,佢(梁朝偉)好靜,幾cool,當時錄音係各自錄。」
離婚後,文文母兼父職,而女兒Jasmine一直抗拒她拍拖,她說:「冇呀,好dry,其實有拍過拖,但維持咗幾年就冇一齊,因為個女反對,當時佢10歲,佢覺得我唔可以有男人,佢喊囉,我都唔知點算,於是我哋坐低傾。」
文文續說:「我同佢講,如果要我揀,我一定會揀你先,我問佢如果有個uncle錫你唔好咩?佢諗咗好耐,然後就話唔係唔好,但驚冇咗媽咪,我話我都想有個人係錫我同錫你,但係如果你唔鍾意,我都會揀你先,我會以你為先,同埋我最愛嘅係你,冇人可以取代你嘅地位。個女開始好啲,𠵱家大咗更加唔會理我,後來我同一個台灣男仔拍拖,可能異地戀好難維繫,拍咗4年就冇咗。」
文文現在跟女兒的關係像朋友一樣,無所不談,還一齊追韓星,她說:「我哋鍾意SHINee,5月嚟香港,會買飛睇,前年一齊睇SHINee,第一次見我個女咁癲,好enjoy好開心,佢企起身大嗌,我做唔出,只係拍手掌。」
採訪:黃曉妍
攝影:陳慧安
場地提供:Harlan's of The ONE

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載