› 選擇地區
三藩市
紐約
洛杉磯
其他美國地區
香港 台灣 北美
 
2017年05月07日

【蘋果VR】【隱世過菠蘿山!】
快消失的「小夏威夷瀑布」

有咩可以一次過滿足晒「影呃like」﹑「呼吸新鮮空氣」同埋「做運動」呢三個願望?當然係去郊遊,親親大自然啦!將軍澳就有個既隱世又邪惡嘅瀑布—「小夏威夷瀑布」,大家唔好畀個名嚇親,只要搭港鐵就可以去到「小夏威夷」㗎喇!想360°感受一吓「小夏威夷瀑布」嘅磅礡氣勢?

只要點擊以下《蘋果VR》網址: http://bit.ly/2qLBLas

「小夏威夷瀑布」之所以有呢個名,因為二十世紀初期,一位旅居香港嘅加拿大籍商人喺度開設麵粉廠,期後麵粉廠執笠;有人就將嗰度嘅儲水池改建為「小夏威夷泳場」。所以呢度就順利成章叫「小夏威夷徑」,而個瀑布就叫「小夏威夷瀑布」喇。

雖然「小夏威夷徑」嘅難度只係一粒星,不過梯級都比較跣,各位hike girl唔好踢拖喇!另外提提大家,除咗做足防曬措施之外,防蚊都非常重要。事關嗰度嘅蚊十分狼死,小記當日已經着住長褲,但都畀惡蚊咬咗超過十啖,所以千祈唔好齋着bra top喇!

此外,大家要好好珍惜「小夏威夷徑」,因為政府打算將將軍澳五幅綠化地帶用嚟起公屋,選址可能包括呢附近。如果落實的話,「小夏威夷徑」就可能要讓路喇。

最後,醒個貼士畀一眾IG女神!如果怕攰﹑怕曬親﹑怕行到腳粗嘅話,女神們可以直接喺將軍澳村出發,唔洗十分鐘就可以直達「小夏威夷瀑布」,輕輕鬆鬆打個卡㗎喇!

電腦用戶可選用Google Chrome瀏覽器,以滑鼠或方向鍵上下左右移動,360°欣賞片段。

手機讀者,可率先下載全新《蘋果VR》程式,立即體驗壹傳媒集團旗下製作之所有360°影片及VR互動資訊:
iOS: http://bit.ly/ADVR_iOS
Android: http://bit.ly/ADVR_Android

文﹑採:植詠珊(Cathy)
剪﹑攝﹑導:Kaman

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載