› 選擇地區
三藩市
紐約
洛杉磯
其他美國地區
香港 台灣 北美
 
2017年05月09日

06年港姐曾瑞珊
傾盡母愛守護短腸兒

【母親節系列之共同抗病】與陳茵媺同屆的06年落選港姐曾瑞珊,跟老公育有兩名子女,日前一家四口到數碼港草地享受家庭樂,4歲半的長子甘珞龍活潑可愛,不過原來他出世不足三日,竟發現患上了「短腸症」!阿珊憶述說:「知道囝囝有事一刻,真係喊到癲咗,喺醫院踢凳,好記得當時媽媽同我講:『邊有小朋友唔食嘢㗎,快啲叫醫生睇啦。』我仲答佢:『唔食嘢唔會死嘅!』偏偏我個仔就係咁嚴重,好怪自己唔及早發現!」

相關新聞:陳茵媺跑贏同屆港姐3年抱3繼續做港姐之冠

「小腸切咗八成」

由於血液未能流到腸,小龍至今接受了五次手術,經歷過嘔血、屙血的折磨,曾瑞珊說:「第一日做完緊急手術,醫生話有機會好啲,但後來發覺唔得,24小時內開肚再切,𠵱家小腸切咗八成,大腸因為功能全失切晒,佢需要接駁喉管到胃部,長期輸營養,左腰就駁咗『造口』排泄。睇佢肥肥白白呃到人,其實佢近年好咗好多,當然佢仲有問題,短腸未駁番,要睇將來情況。」

一度情緒崩潰

為了照顧患病的兒子,曾瑞珊身心俱疲,兩年前更因情緒崩潰,跟老公陷離婚危機:「有段時間我好抽離,覺得小朋友唔係我嘅,但我又有責任照顧佢,去到醫院我仲識得笑,因為我知唔可以『冧』。但後來發覺情緒發洩唔到,試過阿仔喊我同佢鬥嗌,又試過打牆,但老公永遠覺得阿仔係最慘,自己係冇資格講,大家觀點與角度拉唔埋,最後我就返外家。」
之後曾瑞珊尋求精神科醫生協助,夫妻度過難關,更決定生多個小朋友,她說:「老公最初唔贊成,因為佢好錫阿仔,覺得全副心機應該放晒阿仔度,但有次見到10歲嘅院友姐姐突然走咗,佢父母剩係得一個女,我將自己代入,如果阿仔真係走咗,我諗我絕望過佢!」
上月女兒出世,改名融融,曾瑞珊說:「因為想佢做人開開心心,幾時都樂也融融。」
採訪:嵐山
攝影:仇志德

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載