› 選擇地區
三藩市
紐約
洛杉磯
其他美國地區
香港 台灣 北美
 
2017年05月11日

【add紅人主場】楊張新悅環保潮媽

一家五口,最愛親近大自然。

「有時我會大叫shut up!」40歲的楊張新悅(Nicola)2007年結婚,生了三個活潑女兒,全家屬大自然戶外分子,親子日全線行山、游水,Nicola自認是規矩多多的惡媽咪,講環保禁浪費,一缸水三個囡囡輪流沖涼,廁紙亂用更要罰配給,「我唔使佢哋飛黃騰達,但要佢哋求生到,同人溝通到,同埋明白環保、資源的道理。」

採訪:林妙萍  
攝影:周樂恒
髮型:Ling Chow of Mi Salon
服裝提供:Tory Burch
場地提供:香港外展訓練學校

楊張新悅和老公、教育局前政治助理楊哲安結婚十年,出名愛環保、愛大自然,萬能阿媽經常一個帶三個女去街市買餸,但親子活動就全家出動。上周帶了三個女兒八歲Lucy、六歲Lily及兩歲半細女Leah,一家五口去外展訓練學校,試玩扒獨木舟。

三女沖一缸水

「你唔好幫佢,等佢自己試吓先!」二女Lily出盡力都搬不郁獨木舟,Nicola堅持要先試後幫,而囡囡們亦非常獨立、自律,衫褲鞋襪自己換。全家感情好好,訪問時,囡囡走來走去,攬頭攬頸,溫馨又溫暖。Nicola說:「其實湊三個真係好辛苦,因為我得兩隻手,同埋一把聲,有時太嘈,我都會大叫shut up,媽咪要peace,平時又要諗吓,今日有冇車,有車就車邊個先?佢要學咩,條路線點行,好似一個電路板喺個腦度咁。」考學校不用煩,反而出埠去旅行最考難度,「好少酒店房有五人房,坐飛機又係要分開坐。」
阿媽唔易做,Nicola坦言作為母親,不求女兒發達出名,只想她們有求生能力,珍惜資源,學懂自理自律,所以環保和大自然,是她教女兩大要求,「一講環保,我就好惡,唔熄燈、亂用水,我就鬧,試過大家姐亂咁拉紙巾,我同佢講,你唔可以再用,去廁所都唔准用,每日配給,等佢知道珍惜。」愛環保,2012年Nicola更在香港大學修讀環境管理碩士,楊家規定,刷牙只可以用一杯水,不能長開水喉;三個女兒用同一缸水沖涼,外出用餐,亦要求餐廳不要過度斟水,以免飲剩。「世界資源好有限,真係唔可以浪費。」
面對現時小朋友人人手機iPad在手,Nicola坦言十分心痛,作為母親,希望每次一家人食飯,是有眼神接觸,用口溝通,「朋友話我係恐龍時代,大女八歲都唔畀佢睇iPad,我覺得,學識一件high tech產品好易,反而人與人溝通同禮貌,都係要自小開始訓練,同埋要灌輸正確嘅思想。」

樂觀環境長大

做了十年全職媽咪,未放過大假,今年更自認「空虛」重投職場,為有份創辦的「心靈雞湯兒童基金」做兒童慈善工作,「人越大,越明白到唔同時間都需要不同幫助,尤其是做父母這一關。我啲小朋友好幸運,冇乜病痛,每日有飽飯食,也有機會去玩,我更加覺得需要去幫助其他家庭。香港貧富差距好大,希望香港每個小朋友都可以有個樂觀嘅環境長大,我主要幫零至六歲,畀唔同資助佢哋,例如睇醫生,可以幫佢哋快啲睇到,唔好有藥醫,但冇錢買藥。」

母親節灌醉女兒

大後日周日就是母親節,楊張新悅最難忘的母親節,是自己灌醉女兒!「真係人生最尷尬,冇諗過第一個灌醉阿女嘅唔係男人,係阿媽。舊年佢哋好nice,一起身就同爸爸整咗個好靚嘅早餐畀我食,爸爸就開咗支香檳畀我飲。我打開雪櫃,見到支桃味嘅汽水物體,咪開咗一齊扮飲酒,點知係有氣嘅甜酒,醉到佢哋暈低咗。」
至於今年的母親節禮物,Nicola最想放一天假,「我要行開一陣,不過我諗啲女唔會掛住我,因為老竇湊仲開心,可以夜瞓、不停睇電視同食糖囉!」

BB車都得的行山徑

楊張新悅鼓勵小朋友親近大自然,推介兩條適合六歲以下兒童的行山路線:

1.大帽山到天文台 約2小時

「即係麥理浩徑第八段,大帽山起步,行到嗰度有個天文台,推BB車都推到,水泥地少少斜咁上上落落,同埋嗰度間中有牛牛出沒,小朋友見到動物會好興奮。唯一係太陽太猛時唔適合,因為冇乜瓦遮頭。」

2.香港仔水塘到薄扶林公園 約1.5小時

「由騎術學校嘅路口入,起步,行一個幾鐘頭,嗰度有樹蔭、有風景,幾舒服,行到薄扶林公園出番嚟。」
至於青少年,她則推薦外展訓練營,「因為係訓練你個人有幾tough,要爬得、跳得,又落得海,同埋team work,呢啲嘢喺市區學唔到。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載