› 選擇地區
三藩市
紐約
洛杉磯
其他美國地區
香港 台灣 北美
 
2017年05月14日

城嫂Moka玩煮飯仔
報紙墊枱勁貼地

天王郭富城喺上個月18號低調娶大陸網紅方媛(Moka),雖然係新婚,但由於城城已經接落唔少job,所以唯有放低盛傳已懷孕嘅Moka,獨自去開工。而Moka亦因為老公唔喺身邊,索性返上海娘家,有爹哋媽咪睇住。

新婚眨吓眼就半個月,Moka都有keep住更新社交網,前日貼過同女性朋友嘅合照後,噚日輪到煮飯仔嘅相,佢留言話:「今天變身家庭小主婦,一個多小時弄出來的三菜一湯,家常菜很健康。」嗰三餸一湯包括蕃茄炒蛋,同一碗相信係紫菜豆腐湯嘅嘢,睇落都幾OK。

不過,網民嘅焦點並不在於城嫂嘅手勢,反而喺墊枱嘅物件——報紙,有網民話:「鋪報紙吃很有家鄉的味道」、「原來都吃的好家常,也都會用報紙鋪桌。好感+(加)」;但亦有「反對派」,話「鋪報紙有點難看,大失雅色」、「不要用報紙」等,一人一句,各種意見都有。

Moka的確係一個好示範,證明嫁咗畀天王唔代表要奢華生活,原來都可以好貼地,但細心啲睇再翻查番,Moka用嚟鋪枱食飯嗰張報紙,好大機會係2012年9月出版嘅報紙,屈指一算,都有成5年咁滯,歷史可能仲早過Moka識城城!城嫂慳家到用儲咗5年嘅報紙嚟墊枱食飯,大家話,慳家慳成咁,城城真是有福了!(睇怕唔會張相係5年前影落,到噚日先po啩……)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載