› 選擇地區
三藩市
紐約
洛杉磯
其他美國地區
香港 台灣 北美
 
2017年05月16日

【獨家】Raidas反目解散?
黃耀光爆有人藉《傾心》追周慧敏

電影《春嬌救志明》入面,春嬌(楊千嬅 飾)同Isabel、Brenda組成MKB48,喺K房唱出80年代組合Raidas嘅經典歌《傳說》,即刻喺網上瘋傳,《蘋果》日前專訪Raidas嘅主腦、為組合作曲嘅黃耀光(Ken),佢對於電影中有呢首歌:「有份知遇之情,真係多謝。」

相關新聞:【未輪到陳德彰】蔣志光幫Raidas和音黃耀光:最先同佢傾

當年Raidas出道短短兩年、只推出1張EP、2張大碟就解散,係咪阿Ken同主唱嘅陳德彰反面?佢話:「冇反面,呢一段時間都曾經見過幾次面,有心病都應該放開啦,吓話?組合必然有啲意見嘅,咁先會有火花。」佢亦暗示「被解散」而唔開心:「唱片公司覺得《傾心》爆咗出嚟,點解唔做一個solo singer。」《傾心》係咪傳聞所講陳德彰要嚟追周慧敏㗎?佢笑住話:「原意唔係嘅,係偶然之中發生咗啫。咁我哋畀寫詞人若愚(黃凱芹筆名)都係追周慧敏㗎!」

訪問中又提到自己曾兩度患上抑鬱症,第一次喺1989年佢話:「因為演藝界寫咗隻歌叫《為自由》,我同蔣志光帶上去北京,後來返落嚟就好低落,嗰陣時唔知咩叫抑鬱症,音樂唔想掂,總而言之乜嘢都唔想做、唔想見人。」之係喺1996年,佢遇上金融風暴做咗「樓蟹」:「入不敷支,孭磚頭吖嘛,就係最大嘅問題。有睇法轉變咗,就係喺下半生我唔會再儲蓄財富,而係會儲蓄快樂,咁快樂就最好幫人。」

現時阿Ken將多年嚟所讀所學嘅心理學、冥想、瑜伽,運用喺正念(Mindfulness)同靜觀減壓課程(MBSR)上並幫人,咁有冇諗過以Raidas去治癒你的歌迷?佢話:「有一個重聚,其實都係一件幾美好嘅事。」咁即係會唔會重組開騷呢?

場地:city oasis
採訪:余燕儀、懷鈺
攝錄:馮峰 Neo
拍攝:沈健程

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載