› 選擇地區
三藩市
紐約
洛杉磯
其他美國地區
香港 台灣 北美
 
2017年05月17日

傳楊明暗撻「白淨版Rosanne」
莊思明得啖笑:邊有咁易呀?

浪子回頭係咪真係金不換?

情史厚過演出史嘅楊明,舊年因拍《愛‧回家》,撻着同劇嘅大馬拿督千金莊思明,兩人好快就認愛,又不時喺社交平台孖住放閃,楊明早排接受訪問時又放聲氣話想成家立室,以為佢滾……係情場翻滾咗咁多年,又已屆36歲,終於肯修心養性,揀定一個伴侶,唔做浪子啦,點知一樣有是非流出。

昨日有周刊報道楊明背住女友莊思明,暗媾現年28歲、貌似「白淨版Rosanne」嘅大台姐仔郭千瑜(Mina),報道指楊明喺自己擔正嗰套《抱佣情人》中,對Mina照顧有加,就算喺月前一場外景戲中,大熱天時困喺架開篷巴士上拍攝,唔使埋位個個落車唞氣期間,楊明同Mina都留喺車上,享受獨處時光。

報道除咗話楊明除低頸巾畀Mina遮太陽之外,更指楊明對女方面部吹氣,又似想對女方晒肌騷quali咁,仲講到佢哋傾偈時,楊明用下身對正Mina頭部……吓?!

周刊指其實好多人都見到楊明同Mina啲曖昧行為,但就當睇唔到。同晚劇組拉隊去尖沙嘴慶功,莊思明冇份演但卻有現身,楊明勁識做,攬實女友好sweet咁,周刊指Mina見到「正印」在場就扮冇嘢,楊明亦表現得比較收斂。

睇番Mina個facebook,發現佢經常貼自己啲開工相上去,當中唔少得同楊明嘅合照;至於報道中提及嘅慶功宴,Mina除咗喺大合照中同楊明及莊思明同相現身外,仲有一張係莊思明同楊明包抄Mina影嘅合照,真係三個主角都喺齊度喇。

報道稱,被蒙在鼓裏嘅莊思明,今個月初接受網台訪問期間,提及同楊明嘅婚事,佢承認兩人之間有共識,亦唔係玩玩吓,不過當同場嘅周志文送上恭賀時,莊思明又即刻閘住,其實莊思明係咪已經索到陣除……?

對於背女友莊思明、暗撻Mina嘅報道,正身處越南拍劇嘅楊明昨日回應傳媒話:「其實我坐嗰個位,就係我要埋位嗰個位,而嗰個女同事企嗰個位,亦係埋位嗰個位,咁同事未埋位傾幾句就叫做『媾』,咁一日咪媾好多人?」

至於莊思明亦對男友百分百信任,佢回應傳媒時就話:「哈哈,佢send咗段報道俾我睇啦,其實真係冇嘢、得啖笑咁囉,行過傾吓偈就話撻着,邊有咁易呀?如果係咁,每拍一套劇咪要換一個女朋友?」

「其實佢係一個好有交帶嘅人,去到邊做緊乜,都會同我講,反而我自己唔算交帶,佢咁做,搞到我都要成日向佢報到。況且,千瑜我本身都識,咁就更加冇可能(撻着)啦!」問到同男友婚期,莊思明就話「在心中」:「冇呃你哋,婚期係未定,不過大家對呢樣嘢一早有共識。」

而楊明頭先更喺Instagram貼咗一張佢瞓喺屋頂嘅相,仲留言話:「第一次到越南感覺非常好,天氣、風景和食物全部都好,還有謝謝劇組為我挑選的露台房間,讓我可以曬太陽。(我真的很喜歡睡覺的)」睇嚟未受周刊報道影響心情。至於莊思明就同家姐開工,兩姊妹仲輪流貼相上Instagram。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載