› 選擇地區
三藩市
紐約
洛杉磯
其他美國地區
香港 台灣 北美
 
2017年05月21日

與張達倫繼續行曖昧
譚凱琪:俾觀眾想像空間

曾經做過小室哲哉徒弟嘅譚凱琪(Zoie),喺13年加入無綫,舊年喺《致命復活》入面,查實都有一場泳池大露背戲,嗰陣已經有唔少網民大讚索爆,今次佢喺《不懂撒嬌的女人》又有露背床戲,再加上同張達倫呢段感情,相信到時會有一定嘅迴響。Zoie昨日接受傳媒訪問,講到呢一幕床戲,佢好口密咁唔肯講箇中原因,只係話:「呢個就係玄機,應該過兩日出街,你哋自己睇吓喇!」

今次原來係Zoie同張達倫首次合作,不過佢哋呢段感情打動到唔少觀眾,Zoie話:「雖然係第一次同張達倫合作,不過合作好愉快,之後拍幾場親密少少嘅場面,因為大家都互相信任,所以拍起嚟好順利,幾take就搞掂。」至於會唔會最終喺埋一齊,Zoie話:「好開心大家鍾意我哋呢段感情線,最後我哋會唔會一齊呢,劇情就真係無一個好確實嘅交代,當係俾觀眾一個好好嘅想像空間。」

被網民捧為另一個暖男嘅張達倫,佢接受傳媒訪問亦都話:「聽到大家咁講,我梗係覺得好開心,可能係因為呢段感情比較寫實,好多人為咗工作兼顧唔到屋企,甚至因為工作而影響咗同屋企人嘅關係,變咗睇起嚟都共鳴。」不過對於張達倫嚟講,最開心係多咗人煲劇:「我身邊都有唔少朋友講緊呢套劇,有時都會問吓啲劇情,呢樣嘢令我覺得好開心,對於演員嚟講,亦係一個好大嘅鼓勵!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載