› 選擇地區
三藩市
紐約
洛杉磯
其他美國地區
香港 台灣 北美
 
2017年06月08日

【add紅人主場】陳法拉 劇之魔咒

有人辭官歸故里,有人漏夜趕科場。
沒有對與錯,只在乎個人取向。陳法拉三年前毅然離港,一個人跑到美國讀戲劇,轉眼明年又畢業。三年過去,在舞台上找到快樂與認同,認識了新男友,未來?「未知呀,邊個畀劇本我,我咪去邊囉,冇乜所謂!」自由自在,結婚生仔,「言之尚早啦,大把時間。」
錯,所有事都是自己揀。

採訪:林妙萍
攝影:郭賢興 造型:陳蔚渝
化妝:Mon Cheng of Annie G. Chan
髮型:Alex So of The Attic
服裝提供:Weekend Max Mara

陳法拉在美國紐約的茱莉亞學院深造戲劇碩士,不時回港還廣告債、片債,早前回港三天為《壞蛋掌門人3》(Despicable Me 3)配音,與黃偉文等一齊日錄夜錄,更要做專訪、拍品牌短片等。

即場喜怒哀樂

法拉聲沙沙受訪,講到第一次配音興奮無比,「原來要用好多energy,好多嗌啦,因為係動作片。初時以為係卡通人物,配音時可以天馬行空咁自己創作,但原來唔係,因為已經有英文版,所以每粒字都要跟番口形,好講準確性,又要靠把聲畀情緒。」美國學戲有voice class,學如何以聲音演出,亦有教授愛爾蘭、加勒比海等不同地方的口音。
戲劇課程經常有新鮮事,試過上堂途中,奧斯卡最佳女配角維奧拉戴維斯(Viola Davis)突然帶一大隊攝製隊到訪,校友畢列谷巴(Bradley Cooper)、奇雲史柏西(Kevin Spacey)等間中客席上堂分享。「第四年,基本上課堂已經上晒,主要係做排戲,一年要做六個舞台劇,我都會演出兩三個。」她指在大學的小劇場可以實驗性質演出,去年與黃子華合作的《前度》,大舞台、要求連續性,感覺完全不同;即場考驗一下她做喜、怒、哀、樂的表情,法拉亦秒速換臉。
留學生生活,周一至六上課、排練,法拉只有周日放假,就簡簡單單洗衫、煲劇,自己也寫劇本,準備拍短片,「唔想咁被動等人搵,亦滿足自己戲癮。換季時,就去中央公園坐吓,環境好靚。」當然,少不了拍拍拖。 法拉法國男友Emmanuel,中文名叫司馬諾,哈佛大學畢業,熱愛中國文化,能說一口流利的普通話,曾任法國駐日外交官,現時從商,「拍咗一年幾,OK,去到比較穩定嘅狀態。佢都喺美國,可以周圍走,我哋時間都比較flexible。」

男友無所不談

法拉坦言未有結婚打算,只想先完成學業,「言之尚早,仲有好多時間喎。」中法情緣要突破文化差異,「我哋最夾係有默契囉,好難講點樣,總之係性格,大家互相配合,有共同語言,可以係effortless。無所不談,仲係好多嘢講,不停咁傾,比較舒服。」至於明年完成學業,但繼續留在美國生活,還是回港?她大笑,「冇乜所謂啦,邊度畀劇本我,我就去邊囉。」

煲美劇‧三套心水

陳法拉在紐約學戲劇,煲美劇,她推介三部心水必睇劇:

1.《A Doll's House, Part 2》

「呢套𠵱家Broadway都做緊,係個好深嘅劇本,演員演得好好,探討女性地位、家庭等。故事係講1900年,一個女人因為婚姻唔快樂,丟低老公、仔女,離家出走,喺當時個年代係好轟動嘅事。Part 2嗰集講個女人,發現原來就算走咗多年後,佢都係未離到婚。」

2.《King Charles III》

「故事係講英女皇死咗之後,邊個做皇帝呢?Charles一路等咗咁多年,原來係William同Kate登基!個古仔幾好玩,英國人寫嚟諷刺政治嘅劇,角色仲有英國首相、政客咁,一大班人,好熱鬧,好好笑,BBC都拍緊。」

3.《Making a Murderer》 

「𠵱家係documentary年代,呢套都係真人真事電視紀錄片。講一個美國中部鄉下地方,一個男人被錯判為殺人兇手,佢坐完一輪冤獄,出嚟追討政府錯失,但就成為全個小鎮公敵。佢嘅處境好慘,一路睇你會一路好嬲,但又會繼續追。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載