› 選擇地區
三藩市
紐約
洛杉磯
其他美國地區
香港 台灣 北美
 
2017年06月27日

古巨基密運婚紗娶助手
發哥發嫂趁拍戲空檔註冊

做得娛樂圈呢行,有曝光當然緊要,但係去到呢啲人生大事位,唔係人人都終意擺上枱,有人鍾意大搞,公告天下,亦有人愛低調,而婚後先被揭已婚嘅藝人歌手例子都唔少。

講到秘婚高手,國際巨星周潤發可算其一,佢同發嫂陳薈蓮於1987年喺新加坡攞酒,當大家都以為佢哋當時係「一條龍」搞喜事時,發嫂舊年先爆料話原來佢哋早喺前一年(86年)10月已經結婚,佢話:當時我陪發哥喺紐約拍電影《秋天的童話》,有一日唔使開工,發哥同我講:『不如我哋去結婚囉!』我就答:『好呀!』跟住我哋就去咗當地婚姻註冊署結婚。」發嫂話當時只係着便服,註冊過程亦好簡單。

早排忙住同發哥拍戲嘅天王郭富城亦係圈中秘婚代表之一,自從城城同大陸女模方媛(Moka)拍拖以嚟屢次傳婚訊,城城亦放晒聲氣話想成家立室,但到真正結婚時,佢又冇公開消息,反而係被《蘋果》發現佢同Moka低調排期註冊先揭發婚事。城城於4月中擺酒娶Moka,雖然唔算大排筵席,但雙方家長,及城城班好兄弟都有份去飲。

另一位秘婚歌手,可以數古巨基,佢同助手Lorraine愛情長跑多年,結果於2014年7月在拉斯維加斯註冊。當時基仔將婚事冚到極密實,連新娘子Lorraine都唔知情,基仔安排朋友幫手運婚紗等所需物品到美國,仲呃Lorraine話去美國係度假。到真正註冊當日,基仔搵人車Lorraine去註冊處,新娘子先如夢初醒,兩人於同年年尾在港補擺喜酒。

而喺DJ界嘅秘婚「高手」比想像中多好多,包括葛民輝、森美同少爺占(甄子康)等,其中少爺占喺2013年情人節宣佈已經瞞婚7年,其妻係幼稚園同學Tina,當日更係佢哋結婚7周年紀念,而少爺占更喺網上平台寫咗段字嚟冧老婆,非常浪漫。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載