› 選擇地區
三藩市
紐約
洛杉磯
其他美國地區
香港 台灣 北美
 
2017年07月04日

識時務定係忘本?
藝人香港出道北上搵銀

現年28歲嘅Janice Man(文詠珊),早喺14歲時被星探發掘成為當年香港第一代o靚模始祖,2007年客串電影《十分愛》從而開始電影事業,2009年加入黎明旗下公司,喺香港都叫做有唔少知名度。而近年佢就轉戰大陸市場,第一部電視劇就係抗日神劇《畢業歌》,之後接拍咗武俠劇《蜀山戰紀之劍俠傳奇》,形象深入民心而成功打開大陸市場越拍越有,嚟緊就會有一部古裝魔幻劇《九州‧海上牧雲記》。

其實Janice Man已經算係遲入大陸市場搵錢嘅香港藝人,同Janice Man同期出道嘅Angelababy、「宇宙巨漿」G.E.M.、「而我不知道」嘅陳偉霆同埋跳出大台嘅王祖藍等,都已經一早打入大陸市場,仲非常風生水起。

Angelababy
同樣28歲嘅Angelababy一樣係o靚模出身,同Janice Man一樣被譽為o靚模始祖,兩人當年可以話係紅極一時,吸納咗唔少fans。2010年同大陸男星黃曉明拍拖,2014年參加大陸版《Running Man》(《奔跑吧兄弟》)被大陸民眾熟悉,2015年同黃曉明喺上海結婚令佢喺大陸人氣更盛,及後2017年1月17日喺香港養和醫院產下一子。

鄧紫棋(G.E.M.)
今年25歲嘅鄧紫棋當年喺香港以16歲之齡出道,仲即刻橫掃各大樂壇頒獎禮嘅新人獎,得到唔少樂壇前輩公開讚揚,被稱為「巨肺小天后」,成名之後佢喺2014年參加大陸節目《我是歌手》令大陸民眾認識到佢,仲吸引咗大量fans,之後就一心一意喺大陸發展從而成為「宇宙巨漿」。

陳偉霆
31歲嘅陳偉霆早喺2003年參加《新秀》以歌手身份出道,不過就一直彈唔起,最為人熟悉都應該係同Angelababy同埋蔡卓妍(阿Sa)拍拖嘅兩段情,而當年因為黃曉明介入而同Angelababy分手,事後黃曉明一句「而我不知道陳偉霆是誰」更成為明句,到o依家一提陳偉霆都一定會有人講。而佢就喺2013年開始將事業重心轉向大陸,憑一套古裝仙俠偶像劇《古劍奇譚》彈出成為大陸「男神」,之後接拍嘅《老九門》更加將佢推向高峰,喺大陸紅到發紫。

王祖藍
37歲嘅王祖藍喺演藝學院畢業後加入大台,早期都係靠上《獎門人》而打響知名度,之後越做越紅,更開拍自己嘅劇集《老表,你好嘢!》,2014年同Angelababy一齊加入大陸節目《奔跑吧兄弟》而成功喺大陸入屋,之後開始喺香港減產但大陸工作就密密接長做長有。

相關新聞:【馮仁昭四圍超】JM着皮褸抵熱嘟嘴皺眉男伴全收

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載