› 選擇地區
三藩市
紐約
洛杉磯
其他美國地區
香港 台灣 北美
 
2017年07月25日

與喬妹10月成婚
宋仲基:我率先提出公開婚訊

韓國男星宋仲基因與宋慧喬合作神劇《太陽的後裔》而撻着,兩人早前宣佈將於10月31號結婚,震驚全城。而近日正忙於宣傳新片《軍艦島》嘅準新郎宋仲基,昨日接受媒體訪問時亦不避嫌提到未來老婆,高調放閃。

宋仲基:「對於即將結婚一事仲未有實感,不過因為公開咗婚訊,身邊唔少人都有恭喜我,而且結婚消息爆出後得到好多粉絲支持,令我覺得我未來都要好好生活,去回饋粉絲嘅祝福及信任。」及後又提到好友李光洙似乎因為佢結婚而唔開心:「噚晚佢唔知係咪飲咗酒,突然發短訊畀我話『你竟然結婚』。」

由於《軍艦島》即將喺後日上映,但雙宋卻喺上映電影前夕公開婚訊,令外界都集中喺宋仲基嘅婚事上,對此宋仲基表示:「雖然有打算電影上映後先公開,但唔係世上所有事都咁順利,所以我率先向喬妹提出不如公開婚訊,對於外界集中喺婚事多過電影,我都感到抱歉。」唔知宋仲基係咪暗指早前話喬妹曾喺其鄉下家中過夜嘅報道呢?宋仲基續指:「因為不實嘅報道令我同喬妹兩人都感到好唔開心,所以索性公開(婚訊),當日發表聲明前我哋都好緊張。」

宋仲基亦大讚喬妹係一個思想成熟嘅人,又指喺對方身上學到好多嘢,並指:「我小時候都冇打算要遲結婚,而且周圍嘅人對我影響好大,特別係車太鉉。」宋仲基表示希望可以好似車太鉉咁,能成為好好兼顧工作及家庭嘅好老公。

另外,新片《軍艦島》人氣勁高,截止韓國時間昨日晏晝2點半,電影預售率已高達65.1%,累積預售人數達21萬1千多人,除咗排預售榜第一名之外,更成為韓國電影史上最高預售人數嘅電影,打破埋2013年《3個特攻美少年》嘅預售人數(9萬7千人)。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載