› 選擇地區
三藩市
紐約
洛杉磯
其他美國地區
香港 台灣 北美
 
2017年08月01日

【馮仁昭四圍超】落選港姐ViuTV劇同性激吻
張敬仁咀女一鏡過

張敬仁(Kendy)2013年以大熱姿態參選港姐,最後大熱倒灶三甲不入,隨即閃離無綫以自由身發展,Kendy本來喺美國生活做金融投資,鋼琴八級兼有唱歌底子,背景唔輸蝕,近日簽咗經理人公司,即刻來個大膽新嘗試,同吳海昕(Sofiee)喺ViuTV新劇《賤民20》有激吻親熱場面。
Kendy日前喺黃竹坑受訪時話:「最初都擔心做唔嚟,性感場面仲要kiss。導演唔嗌cut都要keep住錫,每次起碼半分鐘以上,直到拍到一個好鏡頭先回氣,都幾激。」Kendy以前讀女校,見唔少同性戀人,身邊亦有朋友係一對,而佢覺得同Sofiee咀一啲都唔尷尬:「我螢幕初吻畀咗Sofiee,之前都好緊張,𠵱家跨進一步,原來唔係咁難啫。」其實Kendy已有圈外男友,佢話男友好明白同支持,認為要爭取機會就要咁做。

相關新聞:楊丞琳破格咀梁洛施Juno臨場被加戲錫男模

想試好多嘢

回想當年喺美國工作,Kendy瞞住家人辭職返港參加選美,如果冇踏出呢一步,𠵱家可能仲喺美國過住平淡嘅銀行工作生活,佢話:「同屆港姐陳凱琳、蔡思貝、劉佩玥、歐陽巧瑩都好好,電視有曝光率係重要,我自己諗法係想試電影、唱歌、舞台劇同其他,所以冇留低發展。」Kendy拒絕接受一條龍捱世界模式,好享受過去嘅一切經歷,唔會後悔自己嘅選擇。
撰文:馮仁昭
場地提供:Campfire(黃竹坑)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載