› 選擇地區
三藩市
紐約
洛杉磯
其他美國地區
香港 台灣 北美
 
2017年08月03日

龐卓欣鍾意「同爸爸打網球」
被淘汰劉穎敏嗜好「撰稿」

香港小姐呢個比賽,參加得嘅佳麗,都要美貌與智慧並重,所以一班佳麗嘅資料,都要報告下自己嘅資料,身高、體重、三圍呢啲就基本啦,仲有一樣就係嗜好喇,其實以前啲嗜好都正正常常,但到咗近年,啲嗜好都奇奇怪怪咁。

好似麥明詩咁,佢嘅嗜好係唱歌,跳阿根廷探戈,看維基百科/時事新聞,以麥明詩嘅能力嚟講,應該係睇英文維基嘅,咁真係學到嘢,如果係睇中文維基呢,可能會睇到啲古怪嘢。

同屆嘅仲有龐卓欣,佢嗜好係:騎馬、唱歌、和爸爸打網球、健身、陪狗狗同行山。

大家留意,龐卓欣嘅嗜好,唔係打網球,而係「同爸爸打網球」,唔通同其他人打就唔係嗜好?

小小超女友郭嘉文,佢嘅嗜好係:唱歌、烹飪、寫作同寵物訓練。嗜好唔係養寵物,而係寵物訓練,幾有大志。

到上年喇,港姐們嘅嗜好都好特別,好似落選嘅陳惠麒咁,佢嗜好係:搜羅健康美味的食物及食肆、瑜珈、唱歌、學習中醫食療保健養生知識,講得好詳細,因為平時啲人都係就咁寫美食咁,但佢就要「搜羅健康美味的食物及食肆」,可惜佢落咗選,唔係嘅話可以做飲食節目。

到咗今年喇,就真係精采喇。

今次嘅候選港姐,嗜好亦填得相當詳細,好似張寶欣咁,佢運動嗰一部分,係要寫埋咩運動,例如排球、游泳、遠足、跑步。

而被淘汰嘅劉穎敏呢,佢嗜好係彈鋼琴、跑步、閱讀、繪畫、撰稿。

點解係「撰稿」?而唔係用「寫作」,咁佢係咪可以撰返佢自己被淘汰嘅稿呢?

梁雯蔚佢其中一樣嗜好係唱歌,但當中強調咗包括粵曲,仲有跳舞,都強調係中國舞,真係相當熱愛中國文化。

順帶一提,好多佳麗都有寫嗜好係「觀賞電影」,字眼上真係靚咗好多,以前就係「電影」兩個字就算,今時今日就要變做「觀賞電影」。唔通真係越多字越有文化?

相關新聞:蔡少芬17歲大熱奪季李珊珊被封身材最好港姐冠軍

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載