› 選擇地區
三藩市
紐約
洛杉磯
其他美國地區
香港 台灣 北美
 
2017年08月10日

入股生煎包店兼顧湊女
謝安琪好忙唔唱歌

人妻謝安琪(Kay)今年3月誕下細女張晴後,一直停工專心湊女,昨日現身銅鑼灣為有份投資的生煎包店剪綵,新任老闆Kay着白色長裙,腰間綁了黑外套遮肚,似乎收身仍須努力。Kay跟拍檔「生煎包王子」蕭潤邦(Oscar)為醒獅點睛,Oscar獲女友江若琳甜蜜撐場,好友JW、陳柏宇、小肥、少爺占、Donald夫婦等到賀。

同張繼聰冇計

Kay大爆Oscar早已「睇中」自己:「做新人時,Oscar已經好支持我,唔知係咪睇中咗我,每次頒獎禮喺側邊鼓勵我教我,我得獎佢好激動。因為一直好想拜佢為大哥,跟佢學做生意,上次大埔分店,由睇舖位到睇人流都跟佢學,自己錢就出少少,意見畀最多。」問到老公張繼聰有否投資?她說:「我同佢都冇計。」
除開生煎包店,Kay還想搞有機清潔劑及環保布袋生意,她說:「因為做環保要多啲市場調查,預計十年內可以做到。」問到是否叠埋心水做生意不再唱歌?她笑說:「𠵱家真係好忙,又要湊女又要做生意,加上𠵱家咁肥仲唱乜嘢歌,心態同之前唔同,享受生活。」

貼江若琳海報

Oscar跟女友江若琳不停放閃,他開心透露已開到第四間生煎包店,問到是否女友旺他?Oscar賣口乖說:「佢精神上好支持我,一個男人有個支持你嘅女人,一定更加有魄力同起勁,信心都大增。」Oscar更將女友的個唱海報貼在店門口,他說:「梗係要支持佢啦,有邊個顧客唔鍾意睇靚嘢㗎。」為撐女友開騷,他更會包起工作人員的膳食,但不會上台做嘉賓,笑言不想搞寸party。江若琳說:「驚佢上台自己會失控。」Oscar笑問:「做乜呀?驚你失控狂吻我呀?」她甜笑指每見男友都好感動。
採訪:馬建華
攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載