› 選擇地區
三藩市
紐約
洛杉磯
其他美國地區
香港 台灣 北美
 
2017年08月17日

星爺難相處?
朱茵:有才華嘅人比較怪癖

貌似王祖藍嘅內地主持金星,一講起佢就會諗起「變性」、「毒舌」,近年佢個東方衛視節目《金星秀》,因為問題夠尖銳,又敢言而大受歡迎,索媽「紫霞仙子」朱茵日前錄新一集,未播出街,已經有兩條宣傳片流出。朱茵現時同老公黃貫中擁有幸福家庭,面對主持金星「拷問」當年同周星馳拍拖嘅往事,朱茵冇刻意避談舊愛,仲爆星爺有才華,但有怪癖,唔係一個易相處嘅人,更有現場知情者講朱茵講咗好多戀情細節,仲惹得金星即場爆粗。
不過暫時就冇得睇完整版,見宣傳片中,主持金星「單刀直入」問朱茵係唔係真係同周星馳拍過拖?朱茵回答:「我們拍戲的時候,是一對好的對手。」朱茵仲話星爺係有才華嘅人,不過有才華嘅人都有怪癖,唔係太易相處,要跟星爺聊天,就要知道呢個人喺呢刻嘅狀態ok先得。
問到星爺心目中最完美嘅女神係唔係佢?朱茵即問非所答:「我不覺得會是我,他頭髮白,是因為他可能不想再去染頭髮,麻煩吧!」咁佢結婚嗰陣,星爺有冇送祝福?朱茵諗咗一陣,笑容有啲尷尬:「我也沒有告訴圈內很多人,沒有!沒有!」
金星又指任何一個電影男導演都有一個靈感女神,金星覺得朱茵就係星爺嘅靈感女神,見朱茵一臉愕然,金星續言:「這個你一定要接受的,我們看這麼半天,就他在跟你拍戲的時候,周星馳是發光的,你也是發光的,他下邊的作品,也可以拍,但他的靈感女神沒了。」
朱茵同星爺喺大家心目中可能係「最佳螢幕情侶」,不過佢哋合作過嘅作品,其實係得《逃學威龍》同《西遊記大結局之仙履奇緣》,朱茵喺1992年同星爺拍拖,發展咗3年地下情,最後因為有傳男方偷食,朱茵決定分手,兩人再見不再是朋友,令到朱茵自信心徹底崩潰,用咗約3年時間先慢慢康復,直到黃貫中嘅出現,朱茵先覺得搵到生命中嘅最愛。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載