› 選擇地區
三藩市
紐約
洛杉磯
其他美國地區
香港 台灣 北美
 
2017年08月20日

逆境反彈 玩《嘻哈》爆紅
MC Jin享受教仔Rap

【蘋果動搞作】
離開,只是一個新的開始。歐陽靖(MC Jin)在內地節目《中國有嘻哈》說出這句話,卻沒有太濫調。對他來說,離開已成習慣,由當日離開美國赴港發展,至返美湊仔,到近日參加內地比賽爆紅,再在節目中被淘汰,但每次離開都有所得着。這天,卸下面具的Hip Hop Man接受本報訪問,暢談他爆紅及與5歲囝囝rap歌的開心經歷。

相關新聞:開巡唱踩入紅館

歐陽靖參加《中國有嘻哈》完全是一個巧合,就算連節目製作人最初找上門時也沒有清晰崗位給他,MC Jin日前接受本報記者專訪時說:「我話不如當Hip Hop Man參加,當我係一個character,想挑戰自己用普通話rap,但問題係佢唔識講普通話嘅,所以佢要去呢個戰場實習,最重要係接觸中國嘅hip hop文化。」

「冇淘汰先尷尬」

機會是留給有準備的人,原來早在《中國有嘻哈》還未構思之前,35歲的MC Jin今年初突然的起心肝花兩個月學普通話,成為日後上內地節目的關鍵。MC Jin在rap界早享譽盛名,卻被淘汰出局,難免被人猜測是普通話不靈光,但他不認同:「如果你純粹睇表現,表現最差,其實都係我。唔單止一啲尷尬都冇,仲係一個好amazing感覺。如果我繼續,冇淘汰我先尷尬!如果你問我成個過程裏面,最有滿足感係邊個moment,我同你講就係淘汰嗰個moment。」
如今MC Jin在內地爆紅,微博粉絲已有163萬,也成為商演的搶手貨。諷刺是,當日他在香港發展時,其才華似被埋沒,他卻對此說:「我最近都聽過好多人講,話我之前喺TVB拍劇嘥晒啦,但我一直冇覺得係浪費,相反,嗰段時間嘅經歷同體驗係畀到我好多。」他指返美國老家純粹因為囝囝Chance出世:「其實由08年6月10號落機,我都冇一個目標話留幾耐,只不過香港一直對我太好,所以一直冇走。」後來因想抽多點時間陪囝囝,他於14年決定返美國。

相關新聞:【出道15年】曾拍荷李活片

返美陪子成長

多得這個歸家決定,MC Jin才沒有錯過Chance的成長片段,他笑說:「佢第一次自己小便,我有睇住㗎!拍晒手嗌叻仔,記住沖廁洗手洗手。全部係我親眼見,唔使透過video。」說到5歲的精靈囝囝,MC Jin難掩心中喜悅,平時雖沒刻意逼囝囝跟自己來個freestyle,但對方早已流着rap的血液:「我咪同佢玩押韻,我講一句,佢接我一句。」他與囝囝的生活片段,自然成創作題材,其作品《Fatherly Advice》甚至有Chance的初試啼聲:「搵阿仔喺後面rap都幾正喎,到佢成段唱晒出嚟,我喺屋企都睇到黐晒線!」
採訪:曹家誠、馮國康、Sapna
攝影:陳順禎
場地提供:M2 Home

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載