› 選擇地區
三藩市
紐約
洛杉磯
其他美國地區
香港 台灣 北美
 
2017年08月22日

【馮仁昭四圍超】
琴姐認得人 收黃夏蕙金雞

李香琴自從五年前退休後,已好少喺公眾場合露面,之前有幾次喺屋企唔小心跌倒,曾有傳85歲嘅琴姐出現腦退化症狀,而前幾日老拍檔譚炳文出席活動時,就話已有11個月冇見琴姐,當時仲嘆氣話唔知佢認唔認得人。

貪靚搽甲油

噚日黃夏蕙喺facebook貼咗張琴姐嘅近照,原來夏蕙姨同炳哥個女譚淑瑩,仲有位女友人一齊去探琴姐。相片所見,琴姐啲頭髮已經白晒,但仲好貪靚,搽咗粉紅色指甲油,拎住一隻金雞擺設,夏蕙姨留言:「我同瑩瑩一齊去探香琴姐,佢身體好番好多啦,仲認得我㖭。」相信關心琴姐嘅朋友都可以放心。
據知,夏蕙姨喺一個禮拜前同譚淑瑩去探琴姐,因為對方成日同琴姐聯絡,所以琴姐一見到譚淑瑩就認得出,至於夏蕙姨,琴姐就諗咗一下。夏蕙姨噚日接受電話訪問時話:「我講起舊事,琴姐雖然反應唔算強,但佢都答『我知,我知』,琴姐狀況好好,好精神。」夏蕙姨今年訂咗好多金雞,但之前未探過琴姐,所以特別留咗一隻送畀琴姐,佢哋逗留咗約一個鐘就走,唔想阻佢休息。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載