› 選擇地區
三藩市
紐約
洛杉磯
其他美國地區
香港 台灣 北美
 
2017年08月29日

難過長輩風災中逝世
張敬軒愛犬病重停工

張敬軒為照顧病重愛犬而暫停出埠工作。

張敬軒和前財爺曾俊華前晚在九展擔任最後一場《暗中作樂 2017》特別嘉賓,已是第三年演出的軒仔,獻唱了好朋友王菀之的《好時辰》,他直言被歌詞感動到差點流淚:「近嚟發生好多唔好嘅新聞,好似澳門嘅天災。我本來都想送啲物資過去,但原來碼頭已經唔再收物資,我都有唔少朋友、親戚、歌迷喺嗰邊,所以都好擔心當地人嘅安全。」軒仔更透露其母有兩位朋友在「天鴿」風災中不幸喪生:「兩位aunties原本諗住去當地探年老嘅父母,喺去緊嘅途中遇到海水倒灌失蹤,過咗一段時間先搵番,亦不幸過咗身,聽到覺得好難過好唔舒服。」

第三期癱瘓

除了為風災遇難者感到惋惜外,軒仔最近亦為患了重病的愛犬而憂心忡忡,他說:「佢屬於第三期癱瘓,即係你篤佢、搣佢會有反應會縮,但就唔能夠靠自己企起身。我同三個工人照顧緊佢,我聽到有啲網上留言,問我點解唔畀隻狗安樂死,除非佢已經失去維生能力,否則盡一切嘅能力一切嘅方法,我都會照顧佢,始終一齊生活咗十幾年,係我屋企嘅一分子。」

軒仔為了照顧愛犬,已經暫停大部份的工作計劃,他感謝公司的體諒:「早幾日出活動時,工人打畀我話佢流鼻血,我又發晒茅好心急想返屋企,所以暫時要出trip啲工作都盡量唔接。」

唔再養寵物

軒仔指計上病重的狗狗和老家廣州所養的,總共有五隻寵物:「等佢哋全部百年歸老,唔會再養任何寵物,我驚自己接受唔到。」
採訪:曹家誠
攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載