蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月24日

《追龍》毒梟戾氣
甄子丹跛豪 折磨兩個人

12,371

【《蘋果》專訪】甄子丹近年參演的電影如《葉問》都是扮演正派,切合他鏡頭後的family man形象。但最近卻為過戲癮接演《追龍》,飾演充滿戾氣的大毒梟「跛豪」,子丹自爆太投入,難於抽離角色,但他又好矛盾,演戲當然想演到最好,成為一個「跛豪icon」,非常折磨。
採訪:比華利、馮國康
場地提供:The Glass Pavilion(E-Max)
化妝:諺瞳小白
髮型:Jacky Leung of IL Colpo PP

甄子丹近年由電影《葉問》到荷李活電影《星球大戰外傳:俠盜一號》(Rogue One:A Star Wars Story),再重返港產片《追龍》,54歲的他不停追求可以發揮的好角色,《追》片挑機呂良偉經典作《跛豪》,子丹強調拍戲理念是為觀眾帶出正能量,這次演大毒梟「跛豪」將是他告別反派之作。

荷李活特技化妝

子丹當日猶豫了幾個月才接演跛豪,為求有所突破,事前做足資料搜集,他日前在九龍灣接受本報專訪時,直認有參考呂良偉舊作:「我唔能夠同呂哥比較,我都要畀觀眾一定新鮮感,資料搜集跛豪好瘦,冇乜頭髮。」造型上想盡量還原真實,子丹版跛豪充滿霸氣,劇組特別聘請荷李活特技化妝把他的上下嘴唇加厚,鼻樑又化上被打裂過傷痕,子丹同時又積極學潮州話:「我喺倫敦為《星》片補戲,教授24小時喺我耳仔疲勞轟炸,潮州話好難學,好多口音。」祖籍台山的子丹即席大晒潮州話,他衝口爆出:「拍死婆成澗㗎機冷」,聽到一頭霧水,原來是「自己人打死無相干」。
瞓身投入角色,子丹表示情緒短時間未及抽離,「呢幾個月,我行路、講嘢、眼神同心態完全投入,嗰段日子係幾痛苦。我試過不自覺同囡囡講咗潮州話,佢猛問我講乜。我係family man,返到屋企要即刻抹走戾氣,第二日開工又要入番人物度,我要活喺兩個人世界裏,好大折磨。」他續說:「好矛盾,演戲梗希望演到最好,等於大家會覺得我係『葉問』,成為一個icon,其實我係演啫。我都希望今次演《追龍》會成功。演埋今次,我唔會再演呢啲反派同咁沉重嘅角色,我真係覺得好辛苦,亦唔想拍呢啲戲種。」子丹銀幕前改邪歸正,他希望參演勵志片、校園片或喜劇:「我𠵱家鍾意拍啲小朋友戲,唔知我係咪返老還童?」他考慮家長指引下才讓囡囡觀看此片。
《追》片其實也令子丹過足戲癮,他與演「雷洛」的劉德華首次合作:「華仔演技精湛,影帝級演員,佢對呢啲片種、題材經驗老到,同佢合作,我可以喺佢身上學到佢嘅心得、修養同睇法。」子丹跟華仔是圈中公認要求嚴謹,他們與王晶都是《追》片監製,所以拍攝時有互相踢橋,子丹說:「一套大製作有幾個監製係好事,唔同角度、聲音可以更全面發展。」

同華仔鬧交激情

子丹自爆跟華仔最激一場是鬧交戲,互相指摘,互相試探,非常有火花,子丹說:「拍攝前一晚,大家都會諗吓自己意見,醞釀情緒,幾部機拍住,有時仲會爆肚。」跛豪與雷洛戲中動口不動手,子丹說:「唔會有我突然舂你一搥,但有位置上拉拉扯扯,我作為演員好享受,華仔啲戲咁好,好過癮。」子丹對《追》片票房沒有期望:「我唔諗,《葉問》都冇諗過爆,我覺得對得住良心拍好每部戲,唔好hea住去搵食,我對自己好挑剔,次次演出都攞苦嚟受,相信咁先有激情。」

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載