蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月12日

陳曉東重返樂壇
洪楗華:當唱歌係職業維生唔容易

10,922

今年40歲嘅洪楗華,佢喺97年同上華唱片完咗約之後冇耐就淡出娛樂圈,轉行做生意,仲同青梅竹馬嘅女朋友結婚,婚後生咗2個小朋友,一直過住幸福嘅家庭生活。直到日前佢再度亮相幕前,勾起大家對當年嘅回憶。

洪楗華坦言佢一直都鍾意唱歌,不過因為單一發展,加上性格嘅問題,對演藝事業難免會有影響,日前佢喺觀塘接受訪問,講到歌手夢,佢話:「其實我好鍾意唱歌,但係要當係職業維生唔容易,如果唔做生意,唔知點維持家庭!」唔講唔知,洪楗華本身亦都係已故歌唱老師戴思聰嘅徒弟,近排陳曉東亦重返樂壇,唔知佢又有冇呢個諗法?佢話:「對我嚟講唱歌係一啲障礙都冇,我由頭到尾都係單一鍾意唱歌,佢哋係多方面發展,睇機會喇,我自己唔抗拒。」

雖然近年大家忙住發展自己嘅事業,不過間中都會聯絡約埋師母一齊食飯:「我哋以前聚埋係唱k,老師走咗之後,東東返嚟都會喺師母嗰度見。我本身同師母一年見幾次,又會keep住拜老師。」

講到同戴老師嘅關係,佢話:「老師對我好好,我係佢其中一個好鍾意嘅徒弟,我17歲就跟佢,當咗佢係我嘅親人,見佢見多過見自己嘅父母,老師又成日教我嘅處世事,成日話:『華仔你唔可以咁,要open mind啲,如果收埋自己唔會有機會。』只不過我自己吸收差啲,有陣時我覺得當年發展唔好,有少少對佢唔住,佢咁睇得起我。」

之不過戴老師生前做過訪問,佢曾經話霆鋒苦練結他,係因為洪楗華同陳曉東嘅關係,佢唔敢喺佢哋面前唱歌,於是苦練結他,甚至當年仲有約埋一齊打牌,洪楗華就話:「我冇同霆鋒打過牌,反而試過去打羽毛球,我哋以前都有一齊去唱K,佢都有份一齊唱喎!」

場地提供:CAY PARTYROOM

相關新聞:【馮仁昭四圍超】20年前掛咪結婚生兩女洪楗華:我都唔鍾意自己

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載