蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月13日

Eason吹住唱 笑阿徐唔睬人

61,789

陳奕迅(Eason)為宣傳國語專輯,在世界各地舉行合共18場名為「Eason says C'mon in~Tour」演唱會。香港站於前晚及昨晚在旺角麥花臣舉行,有「吹神」之稱的他邊唱邊「吹」,又向台下老婆徐濠縈(阿徐)施冧功,以歌曲《人生馬拉松》來形容她,更笑言觀眾想見他可以去他家,但要問老婆先,Eason說:「但佢唔睬人㗎!」

陳奕迅踩過無數次紅館台板,但為宣傳國語專輯《C'mon in》,前晚及昨晚踩入旺角麥花臣場館,舉行一連兩晚演唱會。今次門票劃一750元,有歌迷向《蘋果》報料,指場外有操不純正廣東話的人、疑似是集團式運作的黃牛黨,向排隊入場的觀眾問價,欲收購門票。

示範反白眼

染了一頭粉紅頭髮的徐濠縈,開場前由後台步出,坐定定等老公上台,但未見囡囡康堤同行,捧場圈中人還有陳柏宇夫婦、郭偉亮和太太葉佩雯、梁漢文夫婦、趙學而、陳志雲及甄楚倩等。演出期間,Eason問觀眾:「有冇人聽晚都嚟?」台下有人歡呼表示有,Eason即笑謂:「咁勁有兩晚飛,介紹啲南亞裔我識吓,我自己都係得20張,攞晒出嚟喇。」有觀眾大叫好想繼續見到他,他便說:「想咪嚟我屋企囉,不過要問我老婆先,但佢唔睬人㗎,死啦!加重咗佢形象㖭,其實佢連我都唔係好睬……講笑啫。」
心情大靚的Eason,在台上扮觀眾舉手投入跳舞,然後說自己不應被影到在台上太high、臉容扭曲的相,但話口未完,他又忽然向觀眾示範反白眼。之後唱《人生馬拉松》時他幫自己tag歌,冧爆老婆阿徐說:「以下呢首歌都係好好嘅,就似我太太咁,《人生馬拉松》。」

對黃牛無符

完騷後Eason接受傳媒訪問,被問到黃牛票被炒至7千元一張,Eason說:「點解佢哋咁多飛?我都冇去助長呢件事,唔係唔同情買唔到飛嘅樂迷,但唔知點控制。」然後又作狀爆喊說:「咁我可以點呀?」問他可會多開場次減少炒風?他認為沒有用:「我上次都開25場啦,咪又係炒,標7千蚊張囉,但又炒得高,經理人又賺少咗,不過咁都代表我有價值,如南亞人士都入嚟睇就勁喇!」至於下一個香港演唱會,他說今年不會,最快明年、後年或大後年的年底,要看是否成功申請到紅館。

提到那英發聲明說不再做《中國新歌星》評判,有份參與的Eason說不知情,但相信因對方已做了六年,所以想休息。至於網民批評節目有黑幕,正如他之前在ViuTV都說有人提醒他按掣,Eason說只係提醒,不是甚麼黑幕,對於被指在節目中一邊打呵欠,一邊唱歌扮黎明(Leon),有網民認為不尊重,Eason即澄清:「我冇詆毀Leon,只係模仿佢唱歌嘅共鳴箒!」他續謂:「實不相瞞,我近年同Leon都有啲私交,所以先模仿吓佢,玩吓搞氣氛,我入行20年都踩咗唔少屎,如果唔熟都唔會咁做。」
採訪:曹家誠
攝影:仇志德

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載