› 選擇地區
三藩市
紐約
洛杉磯
其他美國地區
香港 台灣 北美
 
2017年10月15日

揭古代莎士比亞式戀愛情節
盧凱彤講老婆魔力

【《蘋果》專訪】
盧凱彤(Ellen)今年6月在台灣出席《金曲獎頒獎典禮》時,宣佈出櫃及已於去年跟攝影師女友余靜萍(小余)結婚,自此Ellen臉上都掛着幸福笑容,Ellen直言小余笑一笑,她就藥到病除,更等如是家一樣,真愛的光環!

相關新聞:「媽咪想抱孫」

盧凱彤有愛情滋潤特別靚之餘,31歲的她日前受訪時大談與太太余靜萍的戀愛情節,看其笑容就知她現在很幸福,年前患上躁鬱症的Ellen更說:「其實愛一個人好奇妙,有時佢喺度,佢笑一笑,佢係畀心理醫生強勁100倍㗎,最好如果佢24小時跟住我,我就唔使食藥啦,呢個就係愛情嘅光芒同魔力!」

一見鍾情

兩人交往七年,08年因為拍攝at17的歌曲《依然親愛的》MV而認識,當時Ellen與小余已一見鍾情:「其實一見鍾情係佢話㗎,我都冇咁大膽講話我哋一見鍾情。最sweet嘅嘢係我哋有一種古代莎士比亞式嘅戀愛情節,我哋係異地戀,所以我哋係由電郵開始談戀愛,以文字去培養愛情。」
Ellen續說:「我記得我哋識咗大概三個月就拍拖喇,但三個月嚟都冇見面。」她續道:「最浪漫嘅,係我哋拍咗拖三年左右,因為好驚個email會crush,我哋就親手寫晒對方寫嘅email,咁就變成一本書,𠵱家有兩本好厚嘅書,我諗有六、七百封email。」

相關新聞:at17重組開騷黃耀明助陣

生命脆弱

兩人拍拖四年,分開了兩年,最後再走在一起並於去年在加拿大結婚,Ellen笑着說:「分手嘅時候都係我提出,我覺得我可以有多啲選擇,要自由,同埋我覺得異地戀唔適合我。跟住我又有躁鬱症,不過躁鬱症教曉我生命好脆弱,所以唔會再輕易離開小余。」又說願意給小余進入自己內心:「搵到一個愛你嘅人反而冇咁難,但係要搵到一個你願意畀佢進入你內心嘅人係好難㗎,我發現小余就係我屋企。即使日後發生乜嘢事,我都會喺你身邊,所以我就同佢講我哋結婚啦。其實係我提出嘅,但係我冇求婚,即我冇跪喺度話你嫁畀我啦,只不過係有日瞓醒就話,不如我哋結婚囉,跟住佢就話好呀。」
採訪:懷鈺
珠寶提供:周生生Chow Sang Sang
場地提供:The Upper House
化妝:Hubei Har
髮型:Cyrus Sit of Salon Amarone

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載