› 選擇地區
三藩市
紐約
洛杉磯
其他美國地區
香港 台灣 北美
 
2017年10月15日

網民留言鬧吳若希「臭X」
師妹林穎彤like咗

吳若希(Jinny)啱啱喺10月10日宣佈同Alex簽紙結婚,婚禮從簡,只係喺唱片公司舉行,喺律師同老闆何哲圖同朋友見證下就做咗人妻,而Jinny亦好快就繼續投入工作。

日前Jinny就客串咗最後一集《終極街頭魔法王》嘅錄影,一齊錄影嘅仲有阿Bob、林穎彤、魔術師甄澤權、何雁詩同6號等等,Jinny更好開心咁喺IG po咗張合照,舉晒v字手勢。

但係Jinny不嬲多haters,有網民就喺相片無啦啦留言「臭X」。講真呢啲留言成日見,但係竟然有個藝人對呢個留言讚好,呢個就係林穎彤(Bella)。林穎彤早喺兩個月前至簽咗加入星夢,同Jinny同一間公司,之前亦傳過Jinny擔心一姐地位被Bella搶走,唔通Bella真係咁急想踢走 Jinny?

林穎彤接受傳媒訪問時話同Jinny唔算朋友:「我係簽咗星夢之後至認識佢(Jinny),我哋真正合作就只係今次,呢集佢係特別嘉賓,只係客串一集。佢係我師姐,我對佢印象好好,我都有聽《越難越愛》。」但係 Jinny對佢印象點佢就唔清楚。

跟住問佢點解like咗個留言,林穎彤就好驚呀叫咗一聲反問:「我like咗個留言?唔係啩!」然後佢即刻check手機:「可能我按錯咗,唔怪得Louis send短訊問我係咪按錯嘢,但嗰陣凌晨我冇睇清楚。」到底真心like定咁啱按錯掣佢自己至知,但Bella就話會向老闆何哲圖同Jinny解釋。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載