› 選擇地區
三藩市
紐約
洛杉磯
其他美國地區
香港 台灣 北美
 
2017年10月20日

【馮仁昭四圍超】減薪得番八千 陳浚霆離無綫

講起顧紀筠嘅28歲囝囝陳浚霆(Andrew),觀眾一定記起佢曾喺無綫節目《街市遊樂團》中做「街僮」畀江美儀狂抦,同埋無綫處境劇《愛.回家之開心速遞》入面隻鬼「風少」。不過陳浚霆喺《街市遊樂團》第三輯已消失,同時《愛.回家》裏一樣係冇咗,仲要劇情冇交代。
陳浚霆突然失蹤,原來因為佢上周已經同無綫完約,結束三年賓主關係。有報道話佢係無綫高層余詠珊同曾勵珍權鬥犧牲品,據知無綫遲遲冇同佢傾續約,差不多完約,公司先話如想續約要將底薪降到得八千,肯做就留低,唔制就過主,陳浚霆一怒之下,劈炮唔撈。但也有指陳浚霆嘅學歷同家底唔差,佢喺美國紐約大學以雙榮譽學士畢業,曾參加過《超級巨聲4》,好鍾意唱歌,但喺無綫就未有機會,意興闌珊下,決定向外闖。

江美儀麥包都撐

陳浚霆前晚直認同無綫冇約,佢話:「我唔細,一續約就續幾年,到時三十幾,四十歲先走出嚟,或者去內地搵機會,驚冇咁嘅魄力。我之前都有同江美儀、麥包諮詢意見,噚晚同《愛.回家》同事講,佢哋覺得我應該試吓出去。」有指陳浚霆嫌人工低離開,佢就話:「錢唔係我主要concern嘅嘢,其實呢個決定都有同媽咪商量,佢都好贊成我唔留低。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載