› 選擇地區
三藩市
紐約
洛杉磯
其他美國地區
香港 台灣 北美
 
2017年10月20日

接連惹上爆乳妹
「醫學界王陽明」:阿嬌反來安慰我

好事多磨,自從阿嬌(鍾欣潼)公開認愛台灣「醫學界王陽明」賴弘國後,阿嬌男友就不斷被翻臭史,首先就爆佢同「華航林依晨」閃電離婚,之後又稱係佢「老婆」嘅爆乳學妹Wendy,前日台灣傳媒又爆佢認愛阿嬌1個月前,即係9月初同一名爆乳妹暢遊日本東京,而佢就透過診所作出回應:「跟阿嬌從認識到交往,都沒有跟其他女生交往或有曖昧關係。」

而有台灣傳媒就搵到當事人回應,賴弘國現時就係陳怡蓉老公開設嘅「聖緹雅醫美診所」,擔任「技術總監暨海外事業部部長」,對於最近爆出一連串新聞,佢都感到非常困擾,賴弘國覺得自己唔係藝人,唔需要靠炒作提高知名度,兼且呢啲新聞對佢嘅工作一啲幫助都冇,亦賺唔到錢。

講到爆乳學妹Wendy,賴弘國話佢係學姐嘅朋友,只係喺朋友飯局見過兩次面,私下根本冇聯絡。至於上月初同醫生朋友出國一事,報道話有一位爆乳女同行,被傳媒形容為疑似「出軌」,賴弘國就話對方係日本人,根本就唔係朋友,只係朋友嘅朋友,到日本傾醫療合作先搵女方幫忙。賴弘國仲話,呢次日本之行,仲因為要趕回台北陪阿嬌,而提早離開東京。

同阿嬌交往三個月,賴弘國就話自己嘅工作好忙,平均一個月有半個月都要周圍飛,所以佢都好珍惜同阿嬌一齊嘅時間。無論飛到越南、內地、日本,都會講俾阿嬌知道,每晚仲會同阿嬌傾視像電話,賴弘國話自己嘅事,阿嬌都好清楚。接二連三被翻舊聞,賴弘國不但冇俾阿嬌扭耳仔,反而收到女友嘅安慰,叫佢唔使太在意。雖然得到阿嬌體諒,但賴弘國睇到標題,都會受到困擾,最擔心係女友,所以佢先會接受台灣傳媒訪問,親自講清楚。

至於上次閃電離婚,賴弘國就自責自己唔夠成熟,但佢就話覺得同阿嬌相處好好,大家有好多話題,所以佢就好重視呢段感情,就好似當初認愛時講過「我很喜歡她,她是很好的女生,也是我想認真走下去的對象。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載