蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月25日
馬上成為壹會員

家庭圓滿冇刻意追仔
城城專𠱁B女:希望做稱職爸爸

郭富城(Aaron)於上月榮升老竇,其30歲上海網紅老婆方媛(Moka)來港生女,小公主剛剛滿月,昨日城城以代言人身份到尖沙嘴出席LONGINES周年慶典,大會送上一對情侶腕錶給他,錶背刻有城城一家三口英文名的首個字母「AMC」,城城宣佈囡囡英文名:「中文名未改,英文名係自己好鍾意一個C字頭嘅,Chant有希望嘅意思,同太太一齊改。」

生日影家庭照

明天踏入52歲的城城,被問到囡囡是否最好的生日禮物?他甜笑說:「可以咁講。」是否今年生日特別開心?他再甜笑:「應該都係,其實願望要不斷創造,呢一刻家庭好圓滿,所以工作上希望更加多突破,因為做爹哋之後唔同咗,希望事業上有更多火花。」城城透露今年生日不用開工,會跟家人食飯切蛋糕:「影吓家庭照,簡單已經好開心。」問到是否已經熟手湊B?他說:「我都係負責玩,因為有嫲嫲、婆婆,仲有陪月,呢方面唔需要我去做,但我都希望可以做稱職爸爸。」

未決定百日宴

之前囡囡滿月,城城一家包括嫲嫲婆婆食飯慶祝,未決定會否擺百日宴,因他的工作已排到過年。有記者笑問現嫲嫲眼中是否沒了兒子,只有寶貝孫女?城城笑說:「唔係,媽咪好有經驗,因為我哋有五兄弟姊妹,自己初為人父先知道媽咪係咁辛苦,學識更加要對屋企人好啲,工作幾忙都要抽時間陪屋企人,相信身邊朋友都知道。」
至於日前有報道指城城找法王祈福,他否認:「當然冇呢啲事,報道憑空想像,大家都知我一向信佛,大寶法王嚟咗,自己出席法教分享會,並唔係乜嘢求子,覺得無論仔定女都係上天賜,係開心事,但未有咁快,BB仲細,順其自然,冇話刻意追求乜嘢,總之呢刻家庭好開心。」
採訪:馬建華
攝影:葉君海

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載