› 選擇地區
三藩市
紐約
洛杉磯
其他美國地區
香港 台灣 北美
 
2017年10月27日

回想98年離寶記好徬徨
湯寶如細場開騷「唔諗一線」

【我們的演唱會】現年46歲的湯寶如是90年代「寶麗金三小花」之一,最近主持無綫節目《流行經典50年》勾起集體回憶,將於下月15日假Star Hall舉行「獨愛音樂25周年」演唱會。當年湯記參加第9屆新秀,演唱《難得有情人》成為梗頸四,日前她在K房再唱這歌想當年:「明明入咗四強,得我一個女仔,坐定粒六一定係我啦,但係一個獎都冇,諗唔到簽咗寶麗金,又見番我參賽偶像關淑怡。」

「阿媽唔認得」

當年女歌手都留長頭髮做玉女,偏偏湯記卻反傳統以短髮殺出重圍:「係咪我好醜樣呢?我嗰陣時問唱片公司,佢話唔係呀,你個樣唔適宜長頭髮,黃偉文幫我做第一隻唱片封套image,帶咗我去Jacky Ma度剪頭髮,佢話不如咁啦幫你剪短,我諗住嗰啲短掂到耳仔,嘩!唔係喎,係鏟青!我返去喊出嚟,阿媽唔認得我呀!我本來好似周慧敏咁長㗎!」
湯記憑《感冒》、《絕對是個夢》及《相思風雨中》上位,可惜那些年太多強敵,湯記於98年黯然離開寶麗金:「最徬徨嗰段時間,唔知自己想點,讀咗犯罪心理學返嚟,跟住又讀會計,其實基本上都隱世咗,有時睇番啲卡拉OK,點解我嗰陣咁瘦嘅,我最肥係150幾磅,有人叫我肥湯,𠵱家125磅,我諗再減多5磅已經夠。」

要享受人生

上次20周年湯記假紅館開騷,今次卻轉場Star Hall,她笑說:「冇唔開心,我樂壇位置係中中哋,到呢個age係自然心態,你鍾意擺我邊度咪邊度囉,其實我無悔㗎!點諗到自己會開演唱會,你仲諗一線,唔好諗啦,我哋呢啲40幾歲中女,係要享受人生。我目標係想做王菲得唔得吖?想做憶蓮得唔得吖?」
採訪:余燕儀、懷鈺
場地提供:RedMR紅人派對(皇室堡)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載