› 選擇地區
三藩市
紐約
洛杉磯
其他美國地區
香港 台灣 北美
 
2017年11月19日

為馬國明放低舊情
黃智雯:結果留一個空間俾大家感受

馬國明同黃智雯主演嘅台慶劇《降魔的》近排成為咗網上熱話,馬明、金剛同小儀呢段親情戲俾人讚,前晚嗰集終於講到黃智雯成魔,兩人感情線都有啲睇頭。靈魂出竅嘅黃智雯,因為想見已經死咗嘅未婚夫,誤信一個叫Naomi嘅護士而被困鬼域,而馬明同胡鴻鈞就入咗鬼域救人。最後黃智雯醒番,表面上好似一切如常,但原來已經變咗魔。

鬼怪片喺大台一直缺乏捧場客,不過《降魔的》打動咗唔少人心,有人睇好馬明做視帝,馬明曾經接受傳媒訪問話,一直都以平常心去睇獎項,拎到獎當然開心,但係最希望仲係觀眾嘅口碑。

同樣被網民讚嘅黃智雯,噚日接受傳媒訪問亦都話:「我自己都好鍾意呢幾集戲,好多人見到我都問我點解變魔,你問我梗係覺得開心,每個角色都有唔同嘅感動位,我自己睇劇本嗰陣,都俾啲情節感動,因為講緊好多唔同嘅情,亦都有好多message帶俾大家,好似叫我哋要珍惜眼前人,但係又要學點樣去放低,所以我相信可以感動觀眾。」

講到最鍾意嘅一場戲,佢就話:「我好鍾意嗰場去鬼域戲,因為係講我放唔低死咗嘅未婚夫,但係因為馬明去咗鬼域救我,令我釋懷咗件事。」結局有篇有一場人魔大戰,佢話:「呢場大戰係因為芷若變咗魔,當我成『魔』之後,有好多動作場面,為咗效果差唔多日日都要吊威吔,試過半夜三更去森林吊威也到天光。」至於同馬明嘅關係,佢話:「呢啲會留啲空間俾大家去諗!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載