› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

一波未平一波又起
單身麥明詩好多仔埋身

聲稱回復單身嘅麥明詩又真係好多仔埋身,不過都正常嘅,話晒係「十優狀元」,仲要英國劍橋大學法律系畢業,又係港姐冠軍,咁優質真係冇乜幾可,阿媽教落真係冇錯,讀好啲書大個真係大把拖你拍,不過同麥明詩傳緋聞嘅全部都係肌肉型男,包括「鴨王」何浩文、「鐵板神算」董半仙個外孫Emil(張存華),仲有最近拍《誇世代》嘅拍檔余德丞。

上年麥明詩同林作嘅「明作戀」關係似是疑非,一時又話林作激嬲麥明詩,一時又話佢哋轉玩地下情,仲被影到揸同牌子嘅車「情侶檔」食宵夜,不過喺「明作戀」糾纏不清嘅時候,突然殺出一個「鴨王」何浩文,仲同林作喺網上明爭暗鬥,最終兩敗俱傷,林作同麥明詩分咗手,而何浩文亦已經有新歡,雖然過咗去,但今年8月,兩人同場嘅時候火藥味都仲未散。

以為麥明詩唔理林作同何浩文兩個之後就可以靜一排?真係「少年你太年輕了」,今年2月麥明詩被《蘋果》影到喺淺水灣密會大隻男,佢就係「鐵板神算」董半仙個外孫Emil張存華,Emil係樂視體育嘅NBA評述及節目主持,不過睇嚟都只係part-time,事關喺佢個facebook,除咗係評述同主持,仲係一間體育公司嘅市場營銷經理,事後Emil接受《蘋果》電話訪問就話大家只係朋友關係。

一波未平一波又起,今年5月有周刊影到麥明詩同拍攝《誇世代》嘅拍檔余德丞,深夜喺中環海濱旁摩天輪拍外景,其間兩人撇甩劇組,孖住去附近日式餐廳食消夜,二人喺餐廳表現得好親密,之後仲去麥記買雪糕一杯兩份分,非常之甜,不過事後麥明詩回覆傳媒時就非常斬釘截鐵咁話:「冇發展空間!」

相關新聞:自稱係兵管接送麥明詩小白臉 凌晨食快餐

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載