› 選擇地區
三藩市
紐約
洛杉磯
其他美國地區
香港 台灣 北美
 
2017年11月28日

亮相ViuTV大台新劇忽然換角
陳國邦:有限制就唔好搵我囉

陳國邦同羅敏莊近十年冇夫妻檔上陣,前日為ViuTV新作《VR驅魔人》喺鴨脷洲開工。回復自由身嘅陳國邦,早前傳因為幫ViuTV做節目,所以被飛出無綫嘅旅遊節目《公公出埠》,而新劇《包青天》原本搵佢演公孫策一角亦臨時被飛。

問無綫係咪處理不當?阿邦:「ViuTV高層魯庭暉先生打個電話嚟同我講唔好意思,無綫我就覺得佢地覺得好清楚,呢個係佢哋處事方式,我將件事講得出嚟係想畀佢哋知道事情發生係咁樣,拍戲任何時候需要換人、換境、換物都會有呢啲情況發生,但點樣處理件事呢?」

羅敏莊戥老公唔抵,覺得已經同個機構冇合約,點解仲有限制。阿邦理直氣壯指:「有限制咪唔好搵我囉,我相信佢哋搵我,唔係因為我知名度,係因為做戲好。例如o依家我接咗一套劇集,突然發生咗啲事,嚴重影響我名聲,你要換人我好明白,但o依家唔係,我係冇合約在身,我都覺得好奇怪,一間大公司處理方式係點做呢?我冇資格教訓佢哋點做,但係你想一間公司係賺錢畀人鬧,定賺緊錢畀人讚,睇你點樣成就一間公司出嚟。」

陳國邦唔敢肯定仲會唔會合作,但就好肯定當中有啲不明事理嘅人存在,又或搵啲明白事理嘅人上場,就仍然有合作空間。阿邦覺得自己同羅嘉良遭遇雷同:「同撈家都想帶出一間公司乜嘢崗位都好,大家係要互相尊重,你唔要我唔緊要。」

有份監製嘅王貽興就話兩公婆今次係不計酬勞,力撐阿邦話「咁難得佢哋脫離大機構魔爪,我一定要搵佢哋兩位拍一啲唔係流水作業式嘅製作。件事都分咗手,識唔識第二個去dating關你x事咩,又撩番人哋,撇脫啲啦,如果係一間大企業對自己咁有自信心,應該係演員嚟搵你至係,而唔係你要困住人哋,呢個係心虛表現。」羅敏莊覺得好多演員拍戲係需要一份尊重,未必係為錢,建議將資源做好製作先會有進步。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載