› 選擇地區
三藩市
紐約
洛杉磯
其他美國地區
香港 台灣 北美
 
2017年12月02日

本土科幻片坎坷實錄
導演梁仲文:港人唔撐自己人!

在香港拍科幻電影如倒錢落海,吃力不討好又沒回報,不合符港人經濟效益原則。偏偏有死士孤身走我路,刀山油鑊來回走幾轉,去堅持自己的大師夢。結果,用大陸資金近百萬,附加血汗淚水夾雜大堆碌到盡的人情卡煉製而成的土炮科幻片《香港大師》,有幸獲邀在「坎坷影展」的閉幕亮相,令一眾「睇死香港科幻片係垃圾」的人大跌眼鏡。電影稍後會正式在戲院公映,坎坷過後真係有艇搭。

80後死士非泛泛之輩,是早年執導《關公大戰外星人》聲名大噪的梁仲文。早前他接受《蘋果》訪問,以為「坎坷」告一段落,但原來只是另一開始。仲文說:「其實今日都仲喺到同編劇(恐懼鳥)對緊英文字幕。」因為拍《香港大師》的資源所限,仲文笑說連請多個PA買飯盒的錢也不夠,辛苦到一個程度是他所有工作都不能與之相比。「冇去到咁極端嘅狀態,山窮水盡,好多嘢要靠自己兄弟死掂佢。完全想像唔到有邊一個位係舒服嘅。」仲文最記得有幕男主角(張進翹)在天台拍攝文戲,在烈日下穿皮褸耍劍,熱到幾乎休克:「點解會咁?就係因為我哋拍攝有好多麻煩嘢,場戲其實係補拍,本身呢件衫係預冬天着,即係上年拍到0依家!」

在有限資金下,惟有靠道具和燈光去配合,這亦是仲文的公司G.V.A. Creative最引以為傲的一環。然而,沒有場地供拍攝,才是香港所有獨立電影人所遇到的最大難題。仲文說:「你喺街拍嘢,一係畀警察趕,一係畀保安趕。都係話走話走,跟住轉頭扮執嘢,然後又拍多幾個shot。」當然他們也有以正常途徑申請許可,只是費用貴得驚人,不是一般獨立製作能負擔:「香港如果話支持電影,唔需要吓吓都係支持好大嘅電影0架。可唔可以細埃製作都支持吓呢?」

仲文自幼受遊戲同動畫薰陶,能將自己興趣發展為事業,亦是他明知香港科幻電影沒市場,仍堅持拍科幻特攝片的原因之一:「如果香港拍特攝片、拍超級英雄,啲人好容易覺得你幼稚。但係睇《Ironman》又唔覺得幼稚。香港人睇唔起香港人,呢個係永遠會出現嘅問題。」

仲文自問沒那麼偉大,能改變港人對土炮科幻片的睇法,但他亦有一個崇高目標,就是朝着特攝片的大師之路進發。「香港人志向永遠都係搵錢,冇諗過喺技術、喺個人創作上有更深度嘅修為,大家唔覺得錢同技術嘅修為係成正比。要成為一個大師?更加冇人會咁講。我自己希望,到我中年、老年,我喺呢方面成為一個大師。」

心志決定一切。

採訪:馮國康、Sapna
攝錄:馮峰、Neo

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載