› 選擇地區
三藩市
紐約
洛杉磯
其他美國地區
香港 台灣 北美
 
2017年12月03日

洪秀兒大方認整容
安檢人員勸換護照相

曾演出韓劇《大王之夢》嘅31歲女星洪秀兒,近年轉攻內地發展,不過依然都有亮相韓國嘅活動同節目。而洪秀兒嘅外貌不時引起外界討論,事關有唔少人覺得佢似范冰冰,其實早於前年8月,洪秀兒亮相韓國節目時都曾坦承自己整過容,當時洪秀兒表示:「因為上眼瞼下垂,所以我做咗眼部手術。喺內地我多飾演神秘、清純嘅角色,所以內地製作方就提出要我做眼部整容嘅建議。」

而洪秀兒日前亮相韓國綜藝節目《黃金漁場Radio Star》時,唔知係咪又唔同咗樣,主持人金國振見到洪秀兒時都猶豫咗一陣先問「係咪(洪)秀兒?」,不過洪秀兒就一啲都唔介意。隨後洪秀兒又喺節目自爆自己喺內地過安檢時向工作人員承認整容嘅事:「有一次喺北京有個電影發佈會,完成發佈會後,我當晚要搭夜機返韓國,所以係化住濃妝咁去安檢。安檢嘅工作人員拎住我嘅護照,再望住我個樣話唔係我,所以我就同佢講『係我,呢度同呢度做咗手術』。」引起現場爆笑。

洪秀兒續指:「不過就算我公開承認整過容,個工作人員都係唔信,就連其他工作人員都圍埋一齊研究。不過好彩有入境紀錄,所以工作人員之後都畀我走,只係叫我快啲換咗護照張相。」對於公開承認整容,洪秀兒就表示唔認為整容手術係錯,所以唔需要隱瞞。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載