› 選擇地區
三藩市
紐約
洛杉磯
其他美國地區
香港 台灣 北美
 
2017年12月07日

【俠味道‧翁靜晶(11)】
寄張相就做咗演員 翁靜晶:從來唔覺得自己靚

提起翁靜晶,大家最快諗到嘅應該都係「佛門女俠」,做過律師、又做過保險,不過當初踏足社會嘅角色,其實係演員。

14歲離家出走,又點解會冇神神走咗去拍戲呢?原來,12歲嘅翁靜晶曾將自拍照寄到《電視周刊》,想成為「仙女」(模特兒),但輾轉傳到劉芳剛導演手中,獲邀演出《年青人》一劇。翁靜晶:「嗰張自拍照係踩住單車,著住短褲,好強悍嗰啲樣嚟,張相本來係寄去一本電動周刊,佢入面有一個環節,俾啲小朋友寄啲相去,佢就會喺你個頭下面畫個身,你可以選擇做嫦娥呀、太空人呀、做警察呀咁,佢會幫你畫落去,我當時唔知係做仙女定做乜,但係就去錯咗製片部,去咗劉芳剛導演嗰度,令到我拍咗第一部電視劇。」提起呢次運氣安排嘅機會,翁靜晶都覺得好得意:「套戲叫做《年青人-風箏》,張國強做我哥哥,余安安做我哥哥嘅女朋友。」

機緣巧合下,翁靜晶就咁成為咗一名演員,其實好多人都覺得,年輕時候嘅翁靜晶的確幾靚女,不過翁靜晶聽到之後笑笑口話:「你話咩話?靚定叻呀?你唔好嚇我啦,老人家唔講靚㗎,老人家講莊嚴,我從來都唔係點化妝,好處係天然囉,冇整過容,我又冇乜特別嘅飾物、冇艷光四射,我係順眼、乾淨,我從來唔覺得自己靚。」

翁靜晶笑言小時候仲嫌自己個樣唔夠威,佢話﹕「如果塊面多撻刀疤就正,以前真係咁長大,13歲前唔着女裝,我係剪短頭髮男仔打扮。由細到大啲朋友都係男仔,係一班男仔嘅一個頭領,有時喺隧道掟石呀,做壞事呀,啲警察嚟追你嘅時候,都叫『o靚仔唔好走』,我知道匿喺女廁嗰度就安全,係後期先慢慢做返啲好女仔嘅嘢。」

記者:嵐山、馮國康、倩宜

攝錄:馮峰、卓振輝

攝影:陳俊強

相關新聞:【俠味道‧翁靜晶(10)】拉埋細佬賣汽水維生 翁靜晶:有腦㗎嘛!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載