› 選擇地區
三藩市
紐約
洛杉磯
其他美國地區
香港 台灣 北美
 
2017年12月07日

瞄準大陸市場?
《溏心風暴3》首周收視低開

被喻為重頭劇嘅《溏心風暴3》喺上周一首播,雖然今次用咗一班有份量嘅演員,好似有夏雨、李司棋、米雪、關菊英同李國麟等人,再搭黃宗澤、王浩信、陳敏之仲有岑麗香,但係似乎雷聲大、雨點小!

日前無綫公佈上周收視,連埋跨平台在內,平均收視只係得22.2(約144萬觀眾收看),同小本經營嘅《降魔的》相比,收視仲差一大截,只係第一集嘅收視有23.9(約155萬觀眾收看),大陸嘅點擊率就話超過2.5億。查實呢套劇推出以嚟,網民嘅反應都係彈多過讚,有人覺得成個故事都係為鬧而鬧,為嘈而嘈,淨係講夏雨為咗報恩,盲目去幫恩公李國麟渡過難關再積怨同反目,差唔多用咗10集舖排都未入到正題,真係好似火姐(李司棋)咁講:「我真係火都嚟呀!」

因為係合拍劇嘅關係,大陸嘅觀眾比香港嘅觀眾可以率先睇,喺星期一晚又可以睇到11至15集,故事叫做有啲進展,講阮兆祥因為洩露咗公司機密,於是被李成昌借啲意動議,等佢冇得做行政總裁,本來李國麟諗住叫李成昌頂上,點知黃宗澤發現佢哋不懷好意,偷偷哋話俾李司棋知,結果李國麟為咗保住主席個位,決定外聘行政總裁呢個位。

最後搵咗唐文龍加入,兩個人嘅不和明朗化咗好多,之後仲話唐文龍同埋陳敏之做同事,雖然敏之明知對方有太太同囡囡,不過仍然好鍾意佢,最後佢哋去咗上海公幹仲撻着!

有網民就喺官網留言話:「中港合拍劇,唔係拍俾香港人睇係睇國內市場,700幾萬對13億,就算點擊率不夠可以請打手,延遲頒獎禮已估到一定有獎,《踩過界》同《使徒行者2》都係合拍劇,喺星馬都滿載而歸,全是俾面隻企鵝。」有人覺得嗰啲所謂嘅金句又或者唱歌仔,亦唔似上嗰兩集咁自然,又係為做而做,甚至夏雨呢種盲目報恩好唔合理。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載