蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月10日
馬上成為壹會員

李珊珊緬懷與前輩拍《烈火》趣事
古天樂不捨江漢「我當佢係老竇」

無綫資深藝員、常被派演富商、父親角色的江漢大前晚病逝,享年78歲。據知江漢晚年患有管脈炎,行動不便轉去療養院。他在無綫劇《烈火雄心》飾演古天樂爸爸,更留下一個慈父形象,古仔昨聞訊表惋惜,大讚他是一位風趣幽默、好好人的前輩,對方會引導入戲,當正江漢如「老竇」,會深深記住這段美好回憶。同劇的李珊珊亦難忘江漢不時在片場帶給大家歡樂。

相關新聞:【童星出身】從影逾60年逾200作品

在電視劇演活富商、大亨、慈父類角色的無綫資深藝員江漢(原名姜永明)童星出身,由粵語片、麗的電視到無綫電視,其作品逾200套。大前晚江漢因病在療養院過世,終年78歲,病逝消息由他太太王小燕通知華南電影工作者聯合會(影聯會)。據悉,江漢年輕時好杯中物,晚年患有管脈炎,令行動不太方便,早前曾入院,之後轉去療養院,其家人正忙於奔波喪事。
江漢由國語片當家小生過渡為電視台實力演員,由於他是瀋陽人,他的廣東話帶濃厚北方口音令人留下深刻印象。他橫跨影視圈逾60年,生前人緣甚佳,故他過逝消息令不少圈中人及曾合作過的後輩惋惜。江漢在92年轉投無綫,熱門劇集包括《烈火雄心》、《衝上雲霄》等,當中他在《烈火雄心》與古天樂、鄧一君飾演的父子情令人印象深刻。

幫對手入戲

古仔對於戲中的「爸爸」江漢過身消息難過,他昨日回覆本報時表示:「噚日聽到消息,真係好突然同唔開心,因為佢係一位好好嘅前輩。同佢喺無綫期間,其實合作好幾部電視劇,而大家特別深刻一部一定係佢做我爸爸嘅《烈火雄心》,同佢合作係好開心。」古仔大讚江漢風趣幽默,亦有指導後輩:「雖然合作時佢唔會揸住你隻手教你點演戲,但同佢演對手戲時,佢會幫到對手入戲。演呢段戲時間,我真係當咗佢係老竇咁,不過我離開電視台後已經好少見到佢,有聽說近年佢病咗,已經好少演戲。希望呢位好好人嘅前輩一路好走,佢喺片場帶畀我嘅美好回憶,我會深深記住。」
另外,李珊珊亦與江漢在《烈火雄心》合作過,她表示:「我啱啱入行,都會戰戰競競,但佢係非常溫暖,平時會突然間帶啲歡樂畀大家,喺我心目中佢係好好人,希望佢好開心去另一個地方,永遠懷念佢。」珊珊更分享了江漢的幽默:「有一場戲佢被鄭子誠整到心臟病,激親之後癱咗唔方便,嗰場戲要佢用步行器慢慢行入房,導演要求佢行快少少,江漢叔話『好』,第二個take佢拎起個步行架行入去,全部人都會爆笑,佢間唔中整吓呢啲幽默去緩衝大家,令到大家都幾精神,又幾開心。」

相關新聞:相識40年 胡楓感可惜

望公司重視

對於演藝圈再損失資深長輩,珊珊就表示:「希望公司重視呢啲演員,因為每一個演員將自己青春、自己歲月交咗畀公司,喺唔同年齡層嚟講,都會有佢發揮嘅功用,都係不可多得,所以都希望公司重視每一個唔同年齡層嘅演員,尤其是蝦叔(關海山)走咗,江漢又離開咗,其實唔好有斷層,每一個演員都好重要,係公司嘅財富嚟。」
採訪:鍾國仁、魯吉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載