› 選擇地區
三藩市
紐約
洛杉磯
其他美國地區
香港 台灣 北美
 
2017年12月11日

學業專制 戀愛自由 翁靜晶恐怖學教女

【俠味道.翁靜晶連載系列之7愛女情切】
現年53歲的翁靜晶20歲嫁給劉家良,長女劉萬儀30歲,母女年齡只差23年。翁靜晶表示在亡夫眼中她亦是長不大小孩,她笑言:「我當咗兩個女好似我個妹,鍾意整蠱佢哋,會拎住啲臘鴨追住佢哋嚟嚇,我婆婆就話係小朋友生小朋友,我哋係buddy,哈哈。」萬儀即望着媽媽說:「唔係追,你係貼落我哋塊面度。」

勿做壞事

翁靜晶愛用非常手法教女,在囡囡3、4歲時竟講恐怖漫畫《多多里復仇日記》:「我本身鍾意玩鬼屋、睇鬼片,以前會帶佢哋去虎豹別墅,入面有十八層地獄嗰啲鬼、勾脷筋嗰啲,我想通過呢啲教育,話畀佢哋知善惡終有報,唔好做壞事。」
母女感情深厚,翁靜晶很緊張囡囡的學業,但感情上卻只要女兒開心,萬儀說:「讀書時有拗撬,佢教嘅方式同我人生睇法唔同,𠵱家睇番都覺得佢好嚴。」萬儀坦言當初有意選讀藝術和哲學,翁靜晶卻有意見:「我會講『你哋點讀都唔夠我叻』,總之留學唔用我啲錢就乜都得,用我啲就我揀。」最終兩女兒都法律系畢業,細女幸儀試過做健身教練,發現賺錢不多,最終向現實低頭,最近亦在英國從事律師相關工作。

永不退縮

問到兩女兒到底像父或母?翁靜晶謂:「佢哋比較老實,我精靈啲,佢哋有樣嘢好,全部唔會追名牌,比較似我,因為劉師傅都鍾意靚車、錶呢啲嘢。」縱然性格有不同,一家人都有共通點,就是對惡勢力永不退縮。
萬儀也直言不會勸媽咪避理佛門事:「佢係為正義,我十分支持,如果勸佢唔好做,佢都唔會聽。」翁靜晶則說:「係呀!我都50幾歲,死就一世,唔死就半世,唯一就係話會唔會連累到屋企人呢?我就咁諗嘅,如果我生你係一個仔,國家需要打仗,我會為我個仔嘅死亡而光榮,因為佢係為國家犧牲。我𠵱家做呢件事係有一定危險,如果我唔去做,我哋保衞唔到我哋嘅香港,如果需要犧牲我同我家人嘅話,我哋都光榮犧牲。」萬儀卻關心媽咪健康,勸她要多做運動強身:「我想佢長命啲,用咗好多時間養我哋,我希望佢有好多時間可以享受自己嘅開心時間。」
採訪:嵐山、馮國康、倩宜
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載