› 選擇地區
三藩市
紐約
洛杉磯
其他美國地區
香港 台灣 北美
 
2017年12月22日

【愛情DQ掣(6)】
送呢啲畀法拉bb?浩嵐:確實有啲淆底

全新配對節目《愛情DQ掣》首輪配對已經出爐。配對當日,Model界法拉bb Sumi同泰拳女Debby同時睇中Youtuber浩嵐,最後浩嵐揀咗法拉bb Sumi,希望大家可以認識多啲。

第一次約會前,大會安排咗個任務,要佢哋各自準備一份禮物畀對方,考吓兩位心思。講到送禮,Sumi笑言自己收禮物比較多,不過覺得大多數男仔都係鍾意實用禮物。佢決定要送手錶畀浩嵐,「我希望佢見到隻錶會諗起我,同我約會一定要準時呀!」唔通之前有啲慘痛嘅遲到回憶?其實Sumi只係見過浩嵐一次,究竟佢對浩嵐有咩睇法呢?Sumi笑話:「雖然佢着嘅衫好舒服,但真係有少少hea嘅。我覺得佢可以着得四正少少!」

去到舖頭,Sumi左試右試,都揀唔定送邊隻手錶好,過程中更不能自拔地自己shopping,要勞煩動主播表妹提醒佢「撒旦回歸」。「如果襯佢嘅話,可能尼龍織帶會好啲,但皮帶好似smart啲。」最後Sumi揀咗聖誕特別套裝,皆因入面已經包括一個錶盤同兩款錶帶,一盒滿足晒兩個願望。

另一邊廂,Youtuber浩嵐話要親手整手繩畀Sumi。佢喺網上搵咗條短片嚟學織手繩,不過第一步已經跟唔上,搞到啲繩打晒結,難怪佢喺度埋怨,「點解我一朝早已經要面對咁多困難,可唔可以畀我人生過得輕鬆少少?」織吓織吓,佢又忽然發表「偉論」,「我越織越發覺,手繩係好冇意思嘅禮物,好啱送畀女仔,可以令佢不斷思考個禮物有啲咩意思。」

最後主持表妹忍唔住問佢:「你肯定真係送呢條手繩畀Sumi?」浩嵐終於肯坦白,「整完之後,確實係有啲淆底...」究竟浩嵐嘅手繩織成點?快啲去片!

之後浩嵐又點樣補鑊?佢同Sumi會唔會有第二次約會?記得留意下集《愛情DQ掣》!

「聖誕約會送禮錦囊」:
約會前留意對方的喜好,選擇禮物可以考慮既實用又有紀念價值的東西。避免送過於張揚的東西,如大花束、大毛公仔,或是太貴價的珠寶。這些東西或會令對方尷尬。當然可以考慮送上手作心意,但亦要預留時間,萬一過程或結果不似預期,亦可以再搵plan B。


Daniel Wellington
查詢電話:24655999

主持、撰稿:何宛珊 (表妹)
攝影:馮峰、Neo
後期:梁依能
視覺設計:Cammie
編導:Kaman、梁依能
監製:仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載