› 選擇地區
三藩市
紐約
洛杉磯
其他美國地區
香港 台灣 北美
 
2018年01月05日

我們的演唱會:
胡楓唱紅館 舞王修出山

將踏入86歲高齡嘅「修哥」胡楓,將於下月10日同11日喺紅館舉行《86破晒紀錄》演唱會,老而彌堅嘅修哥日前接受專訪時好自信咁話:「我平時多做運動,夠健康,身體固然之係好,做演唱會應該問題唔大嘅,問題比較大啲呢就係要跳舞,唔知道自己跳成點,夠唔夠氣呀!」
修哥係粵語片年代小生,由於經常拍歌舞片而被封「舞王修」,修哥話𠵱家年紀大咗記性冇咁好,惟有盡量勤力啲練習舞步。縱橫娛樂圈64年嘅修哥,最開心同最唔開心都因為一個人:「我最開心得到我太太、事業、家庭、契仔契女,同埋識到一班好好嘅朋友,最唔開心最痛苦係唔見咗太太!」

心繫已故妻子

前年10月修哥愛妻呂詠荷因病離世,失去老伴令修哥承受一生最痛,結婚59年鶼鰈情深:「後生時候個個都搵我拍戲,一日兩三組閒閒哋,搞到自己唔夠瞓,直情冇家庭生活,錯過咗同仔女一齊嘅時刻,有時自己都覺得好內疚!」修哥畀天上嘅太太掌聲:「真係好!從來未曾哦過我,我太太好諒解我,知道我工作係日以繼夜,所以佢唔識講哦文,仲好好服侍㖭。」修哥話到𠵱家仍然好掛住太太。
太太係咪初戀?風趣嘅修哥話:「講拍拖就真係好多次,第一次同太太拍拖,第二次同芳艷芬,第三次同白雪仙、吳君麗……全部拍過晒,我係大情人嚟㗎。」修哥話冇諗過退休,覺得有嘢做就好開心,而呢一切已經將所有辛苦全部蓋過晒。
場地提供:狀元樓@iSQUARE

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載